کراچی......ضمنی انتخاب برائے این اے 246کی نشست پرنامزد متحدہ قومی موومنٹ کے امیدوار کنو نوید جمیل ایڈووکیٹ کی انتخابی مہم زور و شور کے ساتھ جاری ہے ۔ انتخابی مہم کے سلسلے میں حلقہ انتخاب میں کارنر میٹنگوں کا انعقاد کیا گیا ، الیکشن دفاتر کے دورے اور گھر گھر جاکر عوام سے رابطے کئے گئے ۔ انتخابی مہم کے سلسلے میں حلقہ انتخاب میں منعقد ہونے والی کارنر میٹنگوں میں نامزد حق پرست امیدور کنور نوید جمیل سمیت حق پرست سینیٹرز ، ارکان قومی وصوبائی اسمبلی اور ایم کیوایم کے ذمہ داران روزانہ کی بنیاد پرشرکت کرکے شرکاء سے خطاب کررہے ہیں ۔ کارنر میٹنگوں میں حلقہ انتخاب کے نوجوان ، بزرگ ، خواتین ، طلباء ، مختلف قومیتوں اور برادری کے عوام بہت بڑی تعداد میں کررہے ہیں اور عوام کی جانب سے کنور نویدکو بھاری اکثریت سے ووٹ دیکر کامیاب کرانے کے عزم کااظہار کیا جارہا ہے ۔انتخابی مہم کے سلسلے میں گزشتہ روز فیڈرل بی ایریا کے علاقے DTایریا ، محمد کالونی ، اسلام پلازہ ، بلاک نمبر 6، LSکیٹگیری ، بلاک نمبر10، فرح ہائٹس ، اختر اپارٹمنٹ ، معمار اپارٹمنٹ ، پرائم اپارٹمنٹ ، شبراتی گوٹھ ، بلاک نمبر 8، حسین آباد ، عزیز آباد نمبر 2جبکہ لیاقت آباد میں اتحاد چوک ، گلی نمبر 1موسی کالونی ، جامو چوک سرکل نمبر2، نز د شریف آباد تھانہ ، گلشن عباس ، الاعظم اسکوائر ، راجپوت کالونی ، جودھ پور برادری ، لیاقت آباد نمبر 10، سکندرآباد ، لیاقت آباد نمبر 8، زم زم پان ہائوس ، طلحہ کمیونی کیشن ، شانی بھائی والی گلی کے مقامات پر کارنر میٹنگوں کا انعقاد کیا گیا۔ اس موقع پرکنورنو ید جمیل اور حق پرست اراکین قومی اسمبلی شیخ صلاح الدین ، ریحان ظفر، آصف حسنین ، سیفان یوسف ،حق پرست اراکین سندھ اسمبلی عامر معین ، انور رضا ، محمود عبد الرزاق ، وسیم قریشی ، سلیم بندھانی نے خطاب کیا اور کہا کہ انتخابات کا عمل عام آدمی کی ہر معاملات میں شرکت و شمولیت کا ذریعہ ہے ، اصل طاقت کا منبع عوام ہی ہیں،ایم کیوایم کی سیاست کا مقصد اقتدار کا حصول نہیں ہے ، ایم کیوایم نے ماضی میں جتنے بھی انتخابات ہوئے ہیں ان میں کامیابیاں حاصل کرنے کے بعد ہمیشہ عوام کے درمیان رہنے اور عوام کے مسائل حل کرنے کو ترجیح دی ہے۔ الطاف حسین اور ایم کیوایم کی باشعور سیاست نے جاگیرداروں اور وڈیروں کے محلات میں شروع دن سے طوفان بپا کیا ہوا اور یہی وجہ ہے کہ ایم کیوایم کیلئے ہر انتخابات کے موقع پر ہی نہیں بلکہ اچھے حالات میں بھی سازشوںکے جال بچھائے جاتے ہیں ،ماضی کی طرح اس مرتبہ بھی ہر آزمائش سے سرخرو ہوکر نکلیں گے ۔ انہوں نے کارنر میٹنگوں کے شرکاء کو الطاف حسین کی ضمانت میں توسیع پر دلی مبارکباد پیش کی اور ان سے اپیل کی کہ وہ 23، اپریل کے ضمنی انتخاب میں حق پرست امیدوار کنور نوید جمیل کو بھاری اکثریت سے ووٹ دیکر کامیاب کرائیں ۔