کراچی.......آج رجب کی ستائیسویں شب ہوگی،یہ وہی با برکت رات ہے جب سرور کونین،نبی آخری الزماں صلی اللہ علیہ وسلم کے لئے آسمانوں کے دروازے کھولے گئے۔ حضور اکرم صلی اللہ علیہ وسلم کا معجزہ واقعہ معراج نسل آدم کے لئے تسخیر کائنات کا سبب بنا۔ رجب کی ستائیسویں شب حضور اکرم صلی اللہ علیہ وسلم کو معراج کا شرف عطا ہوا، جب رب کائنات کی رحمت،رات کے مختصر وقفے میں رحمت اللعالمین کو مسجدِ حرام سے نہ صرف مسجدِ اَقصیٰ تک بلکہ کائنات کی لا محدود وسعتیں پار کر کے سوئے عرش پرلے گئی۔ سفر کے آغاز میں جبرائیل امین نے نبی رحمت صلی اللہ علیہ وسلم کی بارگاہ میں براق حاضر کیا۔ سفر کے دوران آپ صلی اللہ علیہ وسلم نےتمام انبیائے کرام کی نماز کی امامت فرمائی۔ آسمانوں پر آپ کی ملاقات مختلف انبیائے کرام علیہ السلام سے بھی ہوئی۔ اسی سفر میں نماز بھی فرض ہوئی،سرور کونین نے جنت کی رحمتیں اور دوزخ کے عذاب کو اپنی آنکھوں سے دیکھا۔ حضور اکرم صلی اللہ علیہ وسلم نے واقعے کی سب سے پہلے تصدیق کرنے پر یار غار،خلیفہ اول حضرت ابوبکر کو ’’صدیق ‘‘کے لقب سے نوازا، واقعہ معراج نے آگے چل کر تحقیق و جستجو کے دروازوں پردستک دی اور انسانوں نےخلاء کے پیچیدہ راستوں کی تلاش کا کارنامہ انجام دیا۔