نیویارک...........اقوام متحدہ نے پاکستان کی درخواست پر 2 افریقی این جی اوز کی مشاورتی حیثیت ختم کردی، دونوں این جی اوز کے پلیٹ فارم سے پاکستان مخالف پروپیگنڈا کیا جاتا تھا۔ بھارت اور اسرائیل نے ان این جی اوز کی مشاورتی حیثیت ختم کرنے کی بھرپور مخالفت کی، مگر انھیں منھ کی کھانی پڑی۔ چین، روس، ایران اور ترکی سمیت 13 ملکوں نے اس معاملے پر رائے شماری میں پاکستان کا ساتھ دیا۔ پاکستان نے اقوام متحدہ کو شکایت کی تھی کہ افریکن ٹیکنالوجی ڈویلپمنٹ لنک اور افریکن ٹیکنیکل ایسوسی ایشن نامی این جی اوز پاکستان کے خلاف غلط بیانی کررہی تھیں اور پاکستان کی علاقائی سلامتی کے لیے خطرہ پیدا کررہی تھیں۔ پاکستان کی شکایت کے مطابق یہ این جی اوز مہران بلوچ کے ساتھ کام کررہی تھیں۔ افریکن ٹیکنیکل ایسوسی ایشن، مہران بلوچ کو پاکستان کےخلاف الزامات لگانے کے لیے پلیٹ فارم مہیا کرتی تھی۔ افریکن ٹیکنالوجی ڈویلپمنٹ لنک کے خلاف درخواست پر اقوام متحدہ کی این جی اوز کمیٹی میں رائے شماری ہوئی جس کا پاکستان بھی رکن ہے۔ پاکستانی موقف کے حق میں 12 اور مخالفت میں 5 ووٹ آئے جبکہ افریقن ٹیکنیکل ایسوسی ایشن کے خلاف درخواسست پر 13 ووٹ حق میں اور 5 مخالفت میں آئے۔ درخواست پر ووٹنگ کے بعد اقوام متحدہ نے ان این جی اوز کی مشاورتی حیثیت ختم کردی ہے اور اب یہ این جی اوز اقوام متحدہ کے انسانی حقوق کمیشن کو سفارشات پیش نہیں کرسکیں گی۔ رائے شماری کے دوران بھارت اور اسرائیل سمیت پانچ ملکوں نے ان این جی اوز کے حق میں ووٹ دیتے ہوئے پاکستانی موقف کی مخالفت کی، جبکہ چین ، ایران ،روس اور ترکی سمیت 13 ملکوں نے پاکستان کی حمایت کی۔