ممبئی .......بالی وڈ فلم انڈسٹری کے لیجنڈری اداکار شمی کپورکے مداح آج ان کی 85 ویں سالگرہ منارہے ہیں۔

21اکتوبر 1930 کوبھارتی ریاست مہارشٹرا کے شہر ممبئی میں پیدا ہونے والے شمی کپور فلموں اور تھیٹر کے مشہور اداکار پرتھوی راج کپور کے منجھلے بیٹے ہیں جنہوں نے اپنے کیرئیر کی ابتدا 1953 ء میں فلم جیون جوتی سے کی۔

50 اور 60 کی دہائی کے مقبول اداکارشمی کپورکے کریڈٹ پر جنگلی، کشمیر کی کلی ، ودھاتہ ، بھرمچاری، راج کمار، دل دے کے دیکھواورچائنا ٹاؤن سمیت کئی سپر ہٹ فلمیں موجود ہیں جن کے گیت آج بھی انتہائی مقبول ہیں۔

شمی کپور نے آشا پاریکھ، مدھو بالا اور شرمیلا ٹیگور سمیت اپنے دور کی تقریباً تمام مشہور اداکاراؤں کے ساتھ کام کیا اور 1968 میں بہترین اداکار کا فلم فیئر ایوارڈ بھی حاصل کیا۔

ان پر فلمایا جانے والے گیت چاہے کوئی مجھے جنگلی کہے آج بھی فلم بینوں میں انتہائی مقبول ہے۔ کئی دہائیوں تک بالی ووڈ فلم انڈسٹری پر راج کرنے والے شمی کپور14اگست 2011ء کو80سال کی عمر میں اس دنیا سے رخصت ہوئے تاہم اپنے مداحوں کے دلوں میں اُن کی یادیں آج بھی تروتازہ ہیں۔