انقرہ........ ترکی کے انتخابات میں حکومتی جماعت جسٹس اینڈ ڈیویلپمنٹ پارٹی ( اے کے پی)کی کامیابی کے بعد ترک صدر رجب طیب اردوان نے دنیا پر زور دیا ہے کہ وہ انتخابات کے نتائج کا احترام کرے۔

اپنے ایک بیان میں انہوں نے کہا کہ حالیہ بدامنی کے بعد رائے دہندگان نے استحکام کا انتخاب کیا ہے ،یکم نومبر کو قومی رائے کا اظہار استحکام کے حق میں کر دیا گیا ہے۔ آئیے، ہم سب ایک ہو جائیں، ایک دوسرے کے بھائی بھائی بن جائیں اور آپس میں مل کر ایک ترکی بن جائیں۔

انھوں نے میڈیا کی جانب سے خود پر کی جانے والی تنقید کو نشانہ بنایا اور انتخابی نتائج کو بین الاقوامی سطح پر تسلیم کرنے کا مطالبہ کیا۔ انہوں نے کہاکہ ترکی میں ان کی جماعت کو اب 50 فیصد ووٹوں کے ساتھ اقتدار حاصل ہو گیا ہے، پوری دنیا کو اس کا احترام کرنا چاہیے لیکن مجھے اب تک ایسی سیاسی بلوغت کا مظاہرہ نظر نہیں آیا۔

خیال رہے کہ جون میں ہونے والے انتخابات میں صدر رجب طیب اردوگان کی اے کے پارٹی مطلوبہ اکثریت حاصل کرنے میں ناکام رہی تھی اور اس کے بعد سے اتحادی حکومت قائم کرنے کی تمام کوششیں ناکام ثابت ہوئیں۔