01 دسمبر ، 2015 
گرین ہاؤس گیسز کے اخراج پر قابو پانے کی کوشش جاری ہے،امریکا،چین
01 دسمبر ، 2015
پیرس.......... امریکا اور چین نے گرین ہاؤس گیسز کے اخراج پر قابو پانے کے لئے پیرس میں اقوام متحدہ کے موسمیاتی تبدیلی کانفرنس کے موقع پر ایک نئے عزم کا اظہار کیا ہے۔
ذرائع ابلاغ کے مطابق امریکی صدر براک اوباما اور چین کے صدرشی جن پنگ کے درمیان کانفرنس کے پہلے دن الگ ملاقات ہوئی جس میں دونوں رہنماؤں نے داعش کے خلاف جنگ، دونوں ممالک کے درمیان ٹیکنالوجی کی سلامتی، جنوبی چین میں بحری تنازعات کے پرامن حل سمیت کئی عالمی اور علاقائی مسائل پر تبادلہ خیال کیا۔
ملاقات کے بعد میں جاری ہونے والے ایک مشترکہ اعلامیے میں دونوں رہنماؤں نے آلودگی پر قابو پانے کے حوالے سے گزشتہ برس کئے گئے وعدے پر عملدرآمد کے لیے تجدیدعزم کا اظہار کیا، اور کہا کہ یہ کانفرنس روایتی موسمیاتی تبدیلی کے چیلنجوں سے نمٹنے کا بہترین موقع ہے۔
صدر اوباما نے کہا ہے کہ دنیا کی دو بڑی معیشتوں اور کاربن پیدا کرنے والے بڑے ممالک کی حثیت سے ان کی ذمہ داری ہے کہ وہ آلودگی کی روک تھام کے لئے مناسب اقدامات کریں۔
