نیویارک........ اقوام متحدہ کے سیکرٹری جنرل بان کی مون کے ترجمان فرحان الحق نے شام سے متعلق امن مذاکرات ملتوی ہونے کی تردید کی ہے ۔

صحافیوں سے گفتگو کرتے ہوئے اقوام متحدہ کے ترجمان فرحان حق نے کہا کہ اجلاس کے لیے 25 جنوری کی تاریخ ہی ابھی تک طے ہے، ا نکا کہنا تھا کہ جب شامی سپورٹ گروپ میں شامل ممالک کی قیادت اس بات پر متفق ہو جائے گی کہ کس مخالف کو مدعو کیا جانا چاہیے تو اقوام متحدہ دعوت نامے بھیجنا شروع کرے گی۔

سیکرٹری جنرل بان کی مون نے ان ملکوں پر زور دیا ہے کہ وہ سمجھوتے پر اتفاق کے لیے کوشش تیز کریں۔جنیوا میں ہونے والے اجلاس میں 17 ممالک شریک ہو رہے ہیں جن میں امریکہ اور روس بھی شامل ہیں جو کہ شام کی خانہ جنگی میں دو مختلف فریقوں کے حامی ہیں۔ ان میں سعودی عرب اور ایران بھی شریک ہیں جو خطے کے دو حریف طاقتیں ہیں۔

دوسری جانب امریکہ کا کہنا ہے کہ صدر بشار الاسد جو کہ اپنے ہی لوگوں پر مظالم ڈھاتے رہے ہیں، شام کے مستقبل میں ان کا کوئی کردار نہیں ہونا چاہیے۔ صدر اسد کے طاقتور ترین حلیف روس کا موقف ہے کہ اس بات کا فیصلہ شام کے عوام پر منحصر ہے۔

اس سے قبل اقوام متحدہ میں سفارتکاروں کا کہنا ہے کہ شام سے متعلق آئندہ ہفتے ہونے والے امن مذاکرات التوا کا شکار ہوسکتے ہیں کیونکہ عالمی طاقتوں کے مابین اس معاملے تکرار جاری ہے کہ شامی حزب مخالف کے کن ارکان کو دینی چاہیے۔یہ بات چیت 25 جنوری کو جنیوا میں طے ہے لیکن ابھی تک اس بارے میں دعوت نامے ارسال نہیں کیے گئے۔