لاس اینجلس ......ہالی وڈ کے صفِ اول کے اداکار جارج کلونی اورا سکارلٹ جانسن کی نئی کامیڈی ڈرامہ فلم "ہیل سیزر"کا لاس اینجلس میں رنگا رنگ پریمیئر ہوا جس میں جارج نے اپنی بیگم اَمل کلونی کے ہمراہ ریڈ کارپٹ پر شاندار اینٹری دے کر مداحوں کو حیران کر دیا۔

میرون رنگ کی وِنٹج کار میں بیٹھے ہوئے دونوں ریڈ کارپٹ پر پہنچے تو لوگوں نے خوشی سے شور مچا کر دونوں کا استقبال کیااور پھر جارج نے مداحوں کو آٹو گراف دئیے اور تصاویر بنوائیں۔

ہدایتکارجوئیل کوین اور ایتھن کوین کی مشترکہ ڈائریکشن میں بننے والی اس فلم کی کہانی ایک ایسے شخص کے گرد گھومتی ہے جسے ایک گروپ اغواء کر لیتا ہے اور ایک لاکھ ڈالر کے بدلے اس کی آزادی کی شرط عائد کر دی جاتی ہے۔

پروڈیوسرٹم بیون ، ایرک فیلنراور کوین برادرز کی اس میوزیکل ڈرامہ فلم میں جارج کلونی اور اسکارلٹ جانسن کے علاوہ شیننگ ٹیٹم، جوش برولن، جونا ہِل، ایلڈن اہرن اور رالف فیئنسن شامل ہیں۔

حیرت انگیز واقعات کی منظر کشی کرتی یہ سنسنی خیز فلم یونیورسل پکچرز کے تحت5فروری کو سنیماگھروں کی زینت بنائی جائیگی۔