لندن میں وزیر اعظم نواز شریف کی اوپن ہارٹ سرجری کا فیصلہ کیا گیا ہے، نواز شریف کی اوپن ہارٹ سرجری منگل کو کی جائے گی۔

ذرائع کے مطابق وزیراعظم نواز شریف دل کے مرض کی علامات کے سبب معائنے کے لیے لندن گئے تھے،ابتدائی طور پر ڈاکٹروں کا خیال تھا کہ نواز شریف کی انجیو پلاسٹی ٹھیک رہے گی، نواز شریف کی دل کی شریانوں کی صحیح صورتحال جاننے کےلیے انجیو گرام کیا گیا، انجیو گرام کے بعد طے پایا کہ انجیو پلاسٹی ٹھیک نہیں رہے گی، مزید ٹیسٹ معائنوں اور اسکینز کے بعد نواز شریف کی اوپن ہارٹ سرجری کا فیصلہ کیا گیا۔

ذرائع کا کہنا ہے کہ اگلےتین دن ان کے آپریشن کی تیاریاں کی جائیں گی، اوپن ہارٹ سرجری کےبعد نواز شریف کو  ایک ہفتے اسپتال میں رہنا ہوگا، پاکستان واپسی کےسفر کے لیے حتمی منظوری ڈاکٹرز دیں گے۔

وفاقی وزیرخواجہ آصف کا اس حوالے سے کہنا ہے کہ ڈاکٹرز نے وزیراعظم نواز شریف کواوپن ہارٹ سرجری کا مشورہ دیا، منگل کے روز وزیراعظم کی اوپن ہارٹ سرجری ہوگی،انہیں سرجری کےبعدریکوری میں ایک ہفتہ لگے گا۔

خواجہ آصف نے مزید بتایا کہ ڈاکٹرز نے وزیراعظم کو آپریشن کے بعد ایک ہفتہ مکمل آرام کا مشورہ دیا ہے، آپریشن کے ایک ہفتے بعد ڈاکٹرز نوازشریف کی صحت کا جائزہ لیں گے، جس کے بعد ان کی وطن واپسی کے حوالے سے فیصلہ کیا جائے گا۔