پاکستان پیپلز پارٹی کے چیئرمین بلاول بھٹوزرداری کا کہنا ہے کہ سابق صدر آصف زرداری کے وطن واپس آنے کا فیصلہ ہو گیا ہے، دیکھ رہاہوں کہ ان کی واپسی کے لیے لاہور کا موسم اچھا ہو گا یا کراچی کا۔

لاہور میں میڈیا سے گفتگو کے دوران انہوں نے صحافیوں سے شکوہ کرتے ہوئے کہا کہ آپ لوگ مجھے پھنسوا دیں گے، میں چاچا پر بات نہیں کرنا چاہتا، نہ کروں گا لیکن پہلا سوال ہی یہی کیا جاتا ہے،اس ملک میں اس سے بڑے بڑے مسائل ہیں۔

بلاول بھٹو زرداری کی لاہور میں صحافیوں سے دلچسپ گفتگو ہوئی جب انہوں نے صحافیوں کو سلام کیا اور ان کی خیریت کے ساتھ موسم کا احوال بھی پوچھا۔

جس پر ایک صحافی نے بلاول کو جواب دیتے ہوئے کہا کہ ’’لاہور کا موسم آپ نے گرما دیا ہے‘‘۔

بلاول نے کہا کہ ’’میں نے موسم گرما دیا ہے؟ مجھے لگتا ہے ابھی موسم اور گرم ہوسکتا ہے، ابھی تو ماحول کافی ٹھنڈا ہے، مزید گرما گرمی ہوسکتی ہے۔

انہوں نے میڈیا سے گفتگو کرتے ہوئے مزید کہا کہ وزیر داخلہ ناکام ہوچکے ہیں، نیشنل ایکشن پلان کو بند کر دیا گیا ہے۔

بلاول بھٹو نے کہا کہ جمہوری احتساب کے لیے 4نکات پیش کیے، حکومت ان پر عمل کرے، میں حکومت سے کیے گئے مطالبات پر بات کرنا چاہتا ہوں۔