07 جولائی ، 2012 
پاک ایران گیس پائپ لائن منصوبے پر تحفظات ہیں، کیمرون منٹر
07 جولائی ، 2012
گڈانی … امریکی سفیر کیمرون منٹر کا کہنا ہے کہ پاک ایران گیس پائپ لائن کے منصوبے پر امریکا کو تحفظات ہیں، تاہم انرجی سیکٹر میں امریکا پاکستان کو تنہا نہیں چھوڑے گا۔ امریکی سفیر کیمرون منٹر نے یہ بات بلوچستان کے ساحلی علاقے گڈانی میں ماہی گیروں کیلئے بنائی گئی جیٹی کے معائنے کے موقع پر میڈیا سے بات چیت کرتے ہوئے کہی۔ ان کا کہنا تھا کہ نیٹو سپلائی کی بحالی کے فیصلے سے پاکستان کی جانب سے دنیا کو مثبت پیغام جائے گا۔ ماہی گیروں سے خطاب کرتے ہوئے کیمرون منٹر کا کہنا تھا کہ امریکا بلوچستان کے ماہی گیروں کو درپیش مشکلات سے نجات دلانے اور مطلوبہ جدید سہولتوں کی فراہمی کیلئے بھرپور تعاون کرے گا۔ کیمرون منٹر نے گڈانی شپ بریکنگ یارڈ کا بھی دورہ کیا اور ناکارہ بحری جہازوں کی کٹائی کے کام کا معائنہ کیا۔
