پاکستانی ویمن کرکٹ ٹیم نے جنوبی افریقا کیخلاف سیریز برابر کردی

تیسرے ایک روزہ میچ میں پاکستان کو آخری گیند پرجیت کے لیے دو رنز کی ضرورت تھی تاہم قومی ٹیم کی کھلاڑیوں نے ایک رن بناکر میچ ٹائی کردیا — فوٹو: پی سی بی 

پاکستانی خواتین کرکٹ ٹیم نے شاندار کارکردگی کا مظاہرہ کرتے ہوئے جنوبی افریقا کے خلاف 3 ایک روزہ میچز کی سیریز 1-1 سے برابر کردی۔

اتوار کو بینونی میں تیسرے اور آخری میچ میں جنوبی افریقا نے پہلے بیٹنگ کرتے ہوئے 6 وکٹوں کے نقصان پر265 رنز بنائے۔

میزبان ٹیم کی جانب سے سونے لوس 80 رنز بناکر نمایاں رہیں جب کہ گرین شرٹس کی عالیہ ریاض نے 2، ایمن، ثنا اور ندا نے ایک ایک کھلاڑی کو آؤٹ کیا۔

ہدف کے تعاقب میں پاکستان کا آغاز اچھا نہ تھا تاہم عالیہ ریاض کی ذمہ دارانہ بیٹنگ کی بدولت گرین شرٹس ہدف کے قریب پہنچی۔

پاکستان کو آخری گیند پر جیت کے لیے دو رنز کی ضرورت تھی، وکٹ پر موجود سدرہ نواز اور نشرہ ساندھو ایک رن بناسکیں اور میچ ٹائی ہوگیا، یوں قومی ٹیم 9 وکٹوں کے نقصان پر265 رنز بناسکی۔

پاکستان کا پہلی بار جنوبی افریقا کے خلاف ون ڈے سیریز جیتنے کا خواب پورا نہ ہوسکا لیکن ویسٹ انڈیز کو دبئی میں ہرانے کے بعد پاکستانی ٹیم نے ایک اور غیر معمولی کارکردگی دکھائی ہے۔

ولمور پارک میں ہونے والے میچ میں پاکستان کی عالیہ ریاض کو میچ کی بہترین کھلاڑی قرار دیا گیا جنہوں نے 49 رنز دے کر دو وکٹیں حاصل کیں اور 82 گیندوں پر 71 رنز کی شاندار اننگز کھیلی۔

دونوں ٹیموں نے 3 ایک روزہ میچز کی سیریز میں ایک ایک کامیابی حاصل کی تھی۔

مزید خبریں :