02 فروری ، 2021
بالی وڈ اداکار رنبیر کپور اور عالیہ بھٹ کے تعلق اور شادی کے بارے میں کافی عرصے سے افواہیں گردش کر رہی ہیں اور دونوں اکثر ایک ساتھ بھی نظر آتے ہیں تاہم میڈیا پر ایک دوسرے کے حوالے سے بالکل بھی بات نہیں کرتے۔
حال ہی میں انسٹاگرام پر سوال و جواب کے سیشن میں عالیہ بھٹ سے ان کے ایک مداح نے پوچھا کہ یہ بات درست ہے یا غلط کہ آپ 8 نمبر سے سے پیار کرتی ہیں جس پر عالیہ نے نہایت ہی منفرد انداز میں اس کا جواب دیا۔
عالیہ بھٹ نے اس سوال پر انسٹاگرام اسٹور ی پر ایک ویڈیو شیئر کی جس میں وہ دونوں ہاتھوں سے دل کا نشان بنائے کھڑی ہیں اور ان کے چہرے پر شرماہٹ بھی دیکھی جاسکتی ہے، یعنی عالیہ نے قبول کرلیا کہ وہ نمبر 8 کو پسند کرتی ہیں۔
لیکن اس نمبر کو عالیہ کی جانب سے پسند کرنے کی ایک خاص بات ہے اور وہ یہ ہے کہ یہ نمبر رنبیر کپور کا پسندیدہ نمبر ہے اور وہ اکثر 8 نمبر کی جرسی پہنے نظر آتے ہیں۔
اپنے ایک حالیہ انٹرویو میں شادی کی خبروں پر عالیہ بھٹ کا کہنا تھا کہ ' سب لوگ یہ کیوں پوچھتے ہیں کہ میں کب شادی کروں گی؟ آپ کو پتہ ہے میں ابھی صرف 25 سال کی ہوں اور میرے خیال میں اس وقت شادی کرنا بہت جلدی ہوگی'۔
اس سے قبل ایک انٹرویو میں عالیہ کا کہنا تھاکہ میری شادی پر تبصرہ کرنے والوں کو تھوڑا انتظار کرنا چاہیے، انہیں انتظار کے بعد اچھی خوشی دیکھنے کو ملے گی اور وہ مایوس نہیں ہوں گے۔