اعصام روہن بوپنا کیساتھ جوڑی کو پاکستان اور بھارت میں پزیرائی ملنے کیلیے پرامید

‏پاکستان کے ٹینس اسٹار اعصام الحق کی بھارت کے روہن بوپنا کے ساتھ ایک بار پھر جوڑی بن گئی ہے۔

پاکستان کے ٹینس اسٹار اعصام الحق کا کہنا ہے کہ انہوں نے ہمیشہ امن کا پیغام دیا ہے، اللہ کرے روہن بوپنا کے ساتھ جوڑی کو پاکستان اور بھارت دونوں ممالک میں پزیرائی ملے۔

انڈو پاک ایکسپریس رواں ماہ میں میکسیکو میں ہونے والے ایونٹ میں ایکشن میں دکھائی دے گی۔

اعصام الحق کا کہنا ہے کہ روہن بوپنا کے ساتھ مل کر دوبارہ کھیلنے کے لیے پرجوش ہوں، میری اور روہن بوپنا کی جوڑی سات برسوں کے بعد ایکشن میں ہو گی۔

اعصام الحق کا کہنا ہے کہ ہم 7 برسوں کے بعد دوبارہ اکٹھے کھیل رہے ہیں، میلبرن میں چند ہفتے قبل ہمارا ایک ساتھ بہت وقت گزرا، اسی دوران ہم نے دوبارہ مل کر کھیلنے کی بات کی۔

ان کا کہنا تھا دبئی اوپن میں ہم نہیں کھیل سکے لیکن میکسیکو میں ہم اکٹھے کھیلیں گے۔

ٹینس اسٹار نے کہا کہ میں نے ہمیشہ کھیل کے دوران امن کا پیغام دیا ہے، میری ہمیشہ کوشش رہی ہے کہ پاکستان کا مثبت اور پرامن امیج دنیا میں جائے، اللہ کرے اس پارٹنرشپ اور دوستی کو دونوں ممالک میں پزیرائی ملے، مجھے امید ہے کہ دونوں ممالک میں اس پارٹنر شپ کو مثبت لیا جائے گا۔

‏اعصام الحق نے کہا کہ ابھی صرف ایک ٹورنامنٹ کے لیے اکٹھے ہوئے ہیں، مستقبل کے ٹورنامنٹس کے لیے ہم بات چیت ضرور کریں گے۔