2 جاہل جو آپس میں خط لکھ رہے ہیں اس سے مسئلے حل نہیں ہوں گے، شاہد خاقان
17 مارچ ، 2021
مسلم لیگ ن کے رہنما شاہد خاقان عباسی نے وزیر اعظم پر تنقید کرتے ہوئےکہا ہےکہ دو جاہل جو آپس میں خط لکھ رہے ہیں اس سے مسئلے مسائل حل نہیں ہوں گے۔
اسلام آباد میں میڈیا سے گفتگو کرتے ہوئے شاہد خاقان عباسی کا کہنا تھا کہ آج ملک میں الیکشن چوری کرنےکا نیا ذریعہ بنانے کی کوشش کی جارہی ہے، جو خود متنازع الیکشن کے نتیجے میں اقتدار میں آئے وہ انتخابی اصلاحات کی بات کر رہے ہیں ۔
ان کا کہنا تھا کہ انتخابی نظام میں شفافیت لانی ہے تو پریزائیڈنگ افسر کو اٹھانے والوں اور کیمرے لگانے والوں کو پکڑیں۔
پاکستان ڈیمو کریٹک موومنٹ (پی ڈی ایم) کے حوالے سے شاہد خاقان عباسی نے بتایا کہ پی ڈی ایم کے کل کے اجلاس میں اتفاق رائے نہیں ہوسکا ،لیکن پی ڈی ایم متحد ہے، ہمارا سفر جاری رہےگا۔
شاہد خاقان عباسی کا کہنا تھا کہ پی ڈی ایم کی کامیابی یہ ہےکہ جو باتیں بند کمروں میں ہوتی تھیں وہ آج عوام کے سامنے ہو رہی ہیں۔
