07 اپریل ، 2021
پشاور ہائیکورٹ نے انسدا دہشت گردی عدالت سوات کے جج آفتاب آفریدی قتل کیس میں نامزد ملزم سینیئر وکیل اور سپریم کورٹ بار ایسوسی ایشن کے صدر عبد الطیف آفریدی کی ضمانت قبل ازگرفتاری کی درخواست منظور کرلی۔
پشاور ہائیکورٹ میں انسداد دہشت گردی عدالت سوات کے جج آفتاب آفریدی قتل کیس میں نامزد ملزم کی ضمانت قبل از گرفتاری کی درخواست پر سماعت ہوئی۔
درخواست پر جسٹس لعل جان خٹک نے سماعت کی۔
عدالت نے ملزم صدر سپریم کورٹ بارایسوسی ایشن عبدالطیف آفریدی کی عبوری ضمانت منظور کرتے ہوئے ایک لاکھ روپے کے مچلکے جمع کرانے کا حکم دیا۔
گزشتہ دنوں صوابی میں انسداد دہشت گردی عدالت کے جج آفتاب آفریدی کو ان کے خاندان کے تین افراد سمیت فائرنگ کرکے قتل کردیا گیا تھا۔
واقعے کے خلاف درج ایف آئی آر میں سپریم کورٹ بار کے صدر لطیف آفریدی اور ان کے بیٹے کو نامزد کیا گیا تھا جس پر لطیف آفریدی کی جانب سے ضمانت قبل ازگرفتاری کی درخواست دی گئی تھی۔