05 جولائی ، 2021 
وزیر اعلیٰ سندھ اور وفاقی وزیر خزانہ کا خصوصی پرواز کے ذریعے دبئی کا سفر
05 جولائی ، 2021
وزیر اعلیٰ سندھ مراد علی شاہ اور وفاقی وزیر خزانہ شوکت ترین نے متحدہ عرب امارات (یو اے ای) حکومت کی خصوصی اجازت سے امارات ائیر لائن سے دبئی کا سفر کیا۔
امیگریشن ذرائع کے مطابق وزیراعلیٰ سندھ مراد علی شاہ، وفاقی وزیر خزانہ شوکت ترین اور معروف بینکر جہانگیر صدیقی سمیت 45 اہم پاکستانی شخصیات نے 4 جولائی کو جناح انٹرنیشنل ائیرپورٹ کراچی سے امارات ائیرلائن کی پرواز EK-607 سے دبئی کا سفر کیا۔
امیگریشن ذرائع کے مطابق وزیر اعلیٰ سندھ مراد علی شاہ سمیت اِن اہم پاکستانیوں کیلئے حکومت پاکستان نے کوئی درخواست نہیں کی تھی بلکہ متحدہ عرب امارت کی حکومت نے ان پاکستانی شخصیات کو براہِ راست امارات ائیرلائنز سے سفر اور دبئی آنے کی اجازت دی ہے۔
یاد رہے کہ امارات ائیرلائنز نے ان دنوں پاکستان سے عام پاکستانی مسافروں کو دبئی لے جانے پر پابندی عائد کر رکھی ہے، جس کی وجہ سے ملازمت اور دیگر اہم کاموں کیلئے متحدہ عرب امارات جانے کے خواہشمند پاکستانیوں کو شدید مشکلات کا سامنا ہے۔
