26 اگست ، 2021 
کراچی پولیس کو افغان شہریوں کا ڈیٹا جمع کرنےکا حکم
26 اگست ، 2021
افغانستان میں طالبان کے مکمل کنٹرول کے بعد افغان باشندوں کے اپنے ملک سے ممکنہ طور پر بڑے پیمانے پر انخلا اور کراچی کا رُخ کرنے کے خدشات کے پیشِ نظر کراچی پولیس کو فوری چھان بین کی ہدایت جاری کردی گئی ہے۔
پولیس ذرائع کے مطابق تمام تھانوں کی پولیس کو کراچی میں پہلے سے مقیم افغان باشندوں کا ڈیٹا اور تفصیلات فوری جمع کرنے کا حکم دیا گیا ہے۔
پولیس ذرائع کے مطابق اس سلسلے میں ہنگامی بنیادوں پر ایک فارم کا اجراء کیا جارہا ہے جو تمام تھانوں کو فوری فراہم کیا جائے گا، فارم میں افغانی باشندوں کا شمار، خاندان کے افراد کی تعداد، تفصیلات، رہائشی مکانات، قیام کی مدت، ان کے قیام کے اسٹیٹس وغیرہ سے متعلق سوالات شامل ہوں گے۔
ذرائع کے مطابق یہ بھی معلومات جمع کی جائیں گی کہ افغان باشندوں کے پاس پاکستان میں قیام کی کون کون سے دستاویزات موجود ہیں۔
اس کے علاوہ تھانوں کی پولیس کو اپنے اپنے علاقے میں لوگوں کی آمدورفت خاص طور پر افغان باشندوں کے پاس آنے والے مہمانوں پر نظر رکھنے کا حکم دیا گیا ہے۔
اس سے قبل بدھ کو وزیراعلیٰ سندھ مراد علی شاہ کی زیرصدارت امن و امان سے متعلق اجلاس میں مراد علی شاہ نے ہدایت کی تھی کہ پولیس افغانستان کی صورتحال کے پیش نظر صوبے میں سکیورٹی سے متعلق خصوصی اقدامات کرے اور صوبے میں جاری مختلف منصوبوں میں جہاں غیر ملکی شہری بھی کام کررہے ہیں، ان کی حفاظت یقینی بنائے۔
