10 اکتوبر ، 2021 
حب میں کار بم دھماکے میں نجی ٹی وی کا رپورٹر جاں بحق
10 اکتوبر ، 2021
کراچی سے جڑے بلوچستان کے صنعتی شہر حب میں ایک کار بم دھماکے میں نجی ٹی وی کے رپورٹر جاں بحق ہوگئے۔
پولیس کے مطابق دھماکا حب میں تھانے کے قریب ایک کار میں ہوا، کار میں نجی ٹی وی کے رپورٹر شاہد زہری اپنے ساتھی کے ہمراہ موجود تھے۔
ابتدائی طور پر دھماکا سی این جی سلنڈر پھٹنے سے بتایا گیا مگر بعد ازاں پولیس اور بم ڈسپوزل اسکواڈ نے موقع پر پہنچ کر تصدیق کی کہ دھماکا بم پھٹنے سے ہوا جو مبینہ طور پر کار میں پھینکا گیا۔
تاہم اس سلسلے میں تصدیق نہیں ہو سکی، حب پولیس کے مطابق دھماکے کے نتیجے میں زخمی ہونے والے دونوں افراد کو سول اسپتال حب پہنچایا گیا جہاں سے شدید زخمی صحافی شاہد زہری کو کراچی کے سول اسپتال منتقل کیا گیا۔
ایدھی فاؤنڈیشن کے ترجمان کے مطابق سول اسپتال کراچی کے ٹراماسینٹر منتقل کیے جانے تک صحافی شاہد زہری جاں بحق ہو چکے تھے، پولیس اور متعلقہ ادارے اس واقعے کی مزید تحقیقات کر رہے ہیں۔
