12 نومبر ، 2021 
’سانحہ اے پی ایس کے ذمہ دار صرف دہشتگرد نہیں انسانیت کے بھی دشمن ہیں‘
12 نومبر ، 2021
پاکستان پیپلز پارٹی کے رہنما اور سینیٹر مصطفیٰ نواز کھوکھر کا کہنا ہے کہ سانحہ آرمی پبلک اسکول (اے پی ایس) کے ذمہ دار صرف دہشتگرد نہیں بلکہ انسانیت کے بھی دشمن ہیں۔
سوشل میڈیا پر جاری اپنے بیان میں مصطفیٰ نواز کھوکھر کا کہنا تھا کہ جنگ، دشمنی اور عداوت کے ہزاروں سال سے کچھ اصول ہیں کہ خواتین، بچے اور بزرگ فریقین کی ضرب سے محفوظ رہیں گے، نبی پاک ﷺکا بھی یہی فرمان ہے۔
مصطفیٰ نواز کھوکھر کا مزید کہنا تھا کہ اس تناظر میں سانحہ اے پی ایس کے ذمہ داران صرف دہشتگرد نہیں بلکہ انسانیت کے بھی دشمن ہیں اور اور انسانیت کے دشمنوں کے لیے کوئی معافی نہیں ہے۔
خیال رہے کہ چند روز قبل وفاقی وزیر اطلاعات و نشریات فواد چوہدری نے اپنے ایک بیان میں کہا تھا کہ حکومت اور کالعدم ٹی ٹی میں مکمل جنگ بندی پر اتفاق ہو گیا ہے اور دونوں فریقین کے درمیان مذاکرات بھی جاری ہیں، افغانستان کی عبوری حکومت کالعدم ٹی ٹی پی کے ساتھ مذاکرات میں ثالثی کا کردار ادا کر رہی ہے۔
