31 دسمبر ، 2021 
کراچی: ارشد پپو قتل کیس میں نامزد برطرف پولیس انسپکٹر سمیت 2 افراد قتل
31 دسمبر ، 2021
کراچی کے علاقے سولجر بازار میں موٹر سائیکل سوار ملزمان کی فائرنگ سے گینگ وار کے سرغنہ ارشد پپو قتل کیس میں نامزد برطرف پولیس انسپکٹر سمیت 2 افراد کو ٹارگٹ کلنگ کر کے قتل کر دیا گیا۔
سینئر سپرینٹنڈنٹ پولیس (ایس ایس پی) ایسٹ قمر رضا جسکانی کے مطابق واقعہ سولجر بازار نمبر دو میں اس وقت پیش آیا جب لیاری کے رہائشی جاوید بلوچ اور محمد مصدق سینٹرل جیل کراچی میں واقع انسداد دہشت گردی کی عدالت نمبر 10 میں پیشی کے بعد گھر واپس جارہے تھے۔
قمر رضا جسکانی کے مطابق تعاقب میں آنے والے دو موٹر سائیکلوں پر سوار چار ملزمان نے فائرنگ کی جس سے دونوں موقع پر ہی جاں بحق ہو گئے۔
پولیس کی ابتدائی تفتیش کے مطابق واردات میں نائن ایم ایم پستول کا استعمال کیا گیا اور جائے وقوعہ سے نائن ایم ایم پستول کے 13 خول ملے۔
ایس ایس پی ایسٹ کے مطابق ابتدائی تفتیش سے ظاہر ہوتا ہے کہ دونوں افراد کو رنجش کی بنا پر ٹارگٹ کلنگ کا نشانہ بنایا گیا، مقتول جاوید بلوچ پولیس کا برطرف انسپکٹر تھا جسے ارشد پپو قتل کیس میں گینگ وار کی سپورٹ کرنے پر گرفتار بھی کیا گیا تھا، اس مقدمے میں عذیر بلوچ بھی گرفتار ہے۔
قمر رضا کے مطابق علاقے کی سی سی ٹی وی حاصل کی جا رہی ہے اور واردات میں ملوث ملزمان کا سراغ لگانے کے لیے پولیس کی ٹیمیں متحرک ہو گئی ہیں۔
