پشاور … پشاور سمیت خیبر پختونخوا کے بیشتر علاقوں، آزاد کشمیر اور پنجاب کے کچھ علاقوں میں زلزلے کے جھٹکے محسوس کئے گئے ہیں،محکمہ موسمیات کے مطابق زلزلے کی شدت 5.3 ریکارڈ کی گئی جبکہ زلزلے کا مرکز گلگت بلتستان سے 300 کلو میٹر دور افغان تاجکستان سرحد تھا، تاحال کسی جانی و مالی نقصان کی اطلاع نہیں ملی۔ نمائندہ جیوز نیو ز محمد نعمان کے مطابق خیبرپختونخوا کے مختلف علاقوں میں شام پانچ بج کر 11 منٹ پر زلزلے کے شدید جھٹکے محسوس کئے گئے ۔ پشاور، سوات، لوئر دیر، چارسدہ، نوشہرہ ، مردان میں زلزلے کے جھٹکے محسوس کئے گئے، ایبٹ آباد ، ہری پور، مانسہرہ، کوہستان اور خیبر ایجنسی میں بھی زلزلے کے جھٹکوں کی اطلاعات ہیں۔ پنجاب کے علاقوں پنڈ دادن خان، چنیوٹ اور سرگودھا سمیت گرد و نواح میں بھی زلزلہ آیا ہے جبکہ میر پور آزاد کشمیر سمیت بالا کوٹ، بٹ گرام، راولا کٹ میں بھی زلزلے کے جھٹکے محسوس کئے گئے ہیں۔ ذرائع کے مطابق زلزلے کا دورانیہ کچھ طویل تھا، تاہم کسی نقصان کی کوئی اطلاع نہیں ملی جبکہ لوگ گھروں سے باہر نکل آئے اور کلمہ طیبہ کا ورد شروع کردیا ۔