21 مارچ ، 2022 
کراچی: منحرف رکن کے گھر کے باہر احتجاج اور ہنگامہ آرائی، پی ٹی آئی کارکنان گرفتار
21 مارچ ، 2022
کراچی میں تحریک انصاف کے منحرف رکن قومی اسمبلی رمیش کمار کے گھر کے باہر احتجاج اور ہنگامہ آرائی کرنے کے الزام میں پی ٹی آئی کے 4 کارکنوں کو گرفتار کر لیا گیا۔
بوٹ بیسن پولیس اسٹیشن میں واقعے کا مقدمہ درج کر لیا گیا جس میں پی ٹی آئی ارکان سندھ اسمبلی شاہنواز جدون اور سعید اللہ آفریدی کے نام بھی شامل ہیں۔
بعد ازاں پی ٹی آئی کارکنوں کی جانب سے کارکنوں کی گرفتاریوں کے خلاف کلفٹن تھانے کے باہر احتجاج کیا گیا۔
اس حوالے سے میڈیا سیل پی ٹی آئی سندھ کا کہنا تھا کہ احتجاج کارکنوں کے اہلخانہ کی گرفتاریوں پر کیا جا رہا ہے، کارکنان کے اہلخانہ کو گرفتار کیا گیا اور ہراساں کیا گیا ہے۔
پی ٹی آئی میڈیا سیل کا دعویٰ ہے کہ احتجاج پر ایس ایس پی ساؤتھ کی جانب سے پی ٹی آئی ایم پی ایز اور کارکنان سے بدسلوکی گئی، سابق صدر ضلع جنوبی مراد شیخ کو گھر سے گرفتار کیا گیا۔
جیو نیوز سے گفتگو کرتے ہوئے پی ٹی آئی کراچی کے صدر بلال غفار کا کہنا تھا کہ ہمارے چار کارکنوں کو گرفتار کیا گیا، میٹروویل اور دیگر علاقوں میں کارکنوں کے گھروں پر چھاپے مارے جارہے ہیں، کارکنوں کی گرفتاری کا سلسلہ نہ رکا تو وزیراعلیٰ ہاؤس کا گھیراؤکریں گے۔
ایس پی کلفٹن روحيل کھوسو اور پی ٹی آئی رہنماؤں کے درمیان مذاکرات کامیاب ہونے کے بعد تھانے کے باہر احتجاج ختم کر دیا گیا۔
