22 مارچ ، 2022 
موجودہ آرمی چیف نے صاف الفاظ میں کہا نواز شریف نے ہمیشہ عزت کی، شہباز شریف
22 مارچ ، 2022
قومی اسمبلی میں قائد حزب اختلاف شہباز شریف کا کہنا ہے کہ موجودہ آرمی چیف نے صاف الفاظ میں کہا کہ وزیر اعظم نواز شریف نے ہمیشہ ہماری عزت کی۔
پریس کانفرنس سے خطاب میں شہباز شریف نے کہا کہ کاوے موسوی کی معافی عمران خان کے منہ پر طمانچہ ہے، یہ نیب نیازی گٹھ جوڑ کے منہ پر زناٹے دار تھپڑ ہے، براڈشیٹ کا ڈراپ سین ہوگیا ہے، کاوے سچ زبان پر لے آیا ہے، کاوے موسوی نے بڑا دل کرکے نواز شریف سے معافی مانگ لی ہے۔
انہوں نے کہا کہ عمران نیازی کا جھوٹ پوری قوم کے سامنے آگیا ، حکومت نے دن رات براڈ شیٹ کا نام لیا ، آج اس کا ڈراپ سین ہوگیا، کاوے موسوی بالآخر سچی بات زبان پر لے آئے، بڑا دل کرکے نواز شریف سے معافی مانگ لی۔
صدر ن لیگ نے کہا کہ نیب نیازی گٹھ جوڑ نے ایڑی چوٹی کا زور لگایا ، 20 سال کی انکوائری میں نواز شریف کے خلاف کچھ نہیں نکلا ، قوم یہ کہنے پر مجبور ہے کہ نواز شریف ہی اس قوم کا مسیحا ہے، نواز شریف واپس آئے گا تو پاکستان دوبارہ ترقی اور خوش حالی کی راہ پر گام زن ہوگا۔
اپوزیشن لیڈر نے کہا آج پی ٹی آئی کے ممبرز اپنے ضمیر کی آواز پر کھڑے ہوگئے ہیں، عمران نیازی کی خاتون ایم پی اے نے سوشل میڈیا پر افواج پاکستان کے خلاف زہر افشانی کی، موجودہ آرمی چیف نے صاف الفاظ میں کہا کہ وزیراعظم نوازشریف نےہمیشہ ہماری عزت کی۔
