بابر اعظم کی نظر میں نمبر ون بولر کون سا ہے ؟

پاکستان کرکٹ ٹیم کے کپتان بابر اعظم کا کہنا ہے کہ فاسٹ بولر شاہین شاہ آفریدی ہر فارمیٹ کے ٹاپ ٹین بولرز میں آنے کے حقدار ہیں، وہ جس طرح محنت کرتے ہیں اور پرفارمنس دیتے ہیں انہیں تو مزید آگے جانا ہے۔

لاہور میں میڈیا سے گفتگو کرتے ہوئے بابر اعظم کا کہنا تھا کہ شاہین شاہ آفریدی ہر فارمیٹ میں ہر  وقت جان مارتا ہے، بحیثیت کپتان میں چاہتا ہوں اور میری دعا بھی ہے کہ شاہین آفریدی مزید آگے جائے، وہ میرے لیے نمبر ون بولر ہے، وہ رینکنگ میں بھی نمبر ون آئے گا۔

خوش آئند بات ہے کہ اب دوسری ٹیمیں بھی پاکستان آئیں گی: بابر اعظم 

 میڈیا سے گفتگو کرتے ہوئے بابر اعظم نے آسٹریلوی ٹیم کے دورہ پاکستان کے حوالے سے کہا کہ آسٹریلیا کا دورہ شاندار  رہا، یہ خوش آئند بات ہے کہ اب دوسری ٹیمیں بھی پاکستان آئیں گی، آسٹریلیا کے خلاف سیریز میں تینوں فارمیٹ میں اچھی کرکٹ ہو ئی، سب سے اچھی بات یہ تھی کہ آسٹریلیا کی ٹیم نے پاکستان میں خوب انجوائے کیا، انہوں نے کرکٹ کو بھی انجوائے کیا اور میدان سے باہر بھی لطف اندوز ہو تے رہے۔

بابر اعظم نے کہا کہ اچھی چیز ہے کہ اس وقت قومی کرکٹرز کاؤنٹی کرکٹ کھیل رہے ہیں، میں نے کاؤنٹی کرکٹ میں فور ڈے کرکٹ تو نہیں کھیلا لیکن میں نے ٹی ٹوئنٹی کرکٹ کھیلی ہو ئی ہے، میں سمجھتا ہوں کہ کاؤنٹی کرکٹ کھیلنے سے کھیل میں بہتری آتی ہے، انگلینڈ کی کنڈیشنز آسان نہیں ہوتیں، وہاں کھیلنا مشکل ہوتا ہے ایسے میں وہاں کھیل کر تجربہ ملتا ہے اور کھیل میں بہتری آتی ہے۔

جب کرکٹ  کھیلنا شروع کی تو تب اس قدر سہولیات نہیں تھیں: بابر اعظم

بابر اعظم نے کہا کہ جب انہوں نے کرکٹ کھیلنا شروع کی تو اس قدر سہولیات نہیں تھیں جتنی اب بچوں اور نوجوانوں کو دستیاب ہیں، اب انڈور ہالز ہیں، جمز ہیں اور سوئمنگ پولز بھی ہیں، اس سے بچوں اور نوجوانوں کو زیادہ سے زیادہ  فائدہ اٹھانا چاہیے، جتنا فائدہ اٹھائیں گے اتنا ان کے لیے اچھا ہے۔

قومی ٹیم کے کپتان کا کہنا تھا کہ جب میں نے کرکٹ شروع کی تو اس وقت جو بھی سہولیات دستیاب تھیں میں ان سے 100 فیصد فائدہ اٹھانے کی کوشش کرتا تھا، اب میں بچوں کو بھی یہی کہوں گا کہ جو دل کرتا ہے وہ کھیلیں، کسی کے کہنے پر زبردستی کھیل مت شروع کریں، اپنی پسند کا کھیل منتخب کریں اور اس میں محنت کریں۔

بابر اعظم نے کہا کہ وہ گالف کھیل کر انجوائے کرتے ہیں لیکن وہ صرف گالف ہی نہیں کھیلتے، وہ کرکٹ سے ہٹ کر دیگر کھیلوں میں بھی حصہ لیتے ہیں اور ان کے بارے میں جاننے کی کوشش کرتے ہیں۔