24 اگست ، 2022 
کراچی میں 28 اگست کو بلدیاتی الیکشن کے انعقاد کیلئے اداروں سے فوری رپورٹ طلب
24 اگست ، 2022
اسلام آباد: الیکشن کمیشن نے کراچی میں بلدیاتی انتخابات کے انعقاد کے لیے 6 اہم اداروں سے فوری رپورٹ مانگ لی۔
اسلام آباد میں الیکشن کمیشن کے ہیڈ آفس میں چیف الیکشن کمشنر سکندر سلطان راجہ کی سربراہی میں کراچی میں بلدیاتی انتخابات کرانے سے متعلق اہم اجلاس ہوا جس میں کراچی میں موسم کی صورتحال اور بلدیاتی الیکشن کے امور کا جائزہ لیا گیا۔
ذرائع کے مطابق چیف الیکشن کمشنر نے کراچی میں 28 اگست کو بلدیاتی الیکشن کے انعقاد کے لیے رپورٹ طلب کی ہے اور سیکرٹری الیکشن کمیشن کو 6 اہم اداروں سےفوری رپورٹ لینے کی ہدایت کردی ہے۔
ذرائع کے مطابق چیف الیکشن کمشنر نے سیکرٹری داخلہ چیف سیکرٹری، آئی جی اور ڈی جی رینجرز سے رپورٹ لینے کی ہدایت کی ہے۔
اس کے علاوہ صوبائی الیکشن کمشنر اور محکمہ موسمیات سے بھی رپورٹ لینے کی ہدایت کی گئی ہے جس میں شہر میں موسم کی صورتحال سے آگاہی طلب کی گئی ہے۔
ذرائع کا کہنا ہےکہ پاک فوج، رینجرز، پولیس اور دیگر ادارے دیہی سندھ میں امدادی کاموں میں مصروف ہیں جس کے باعث پولنگ سے سیلاب سے متاثرہ علاقوں میں امدادی کام کے متاثر ہونے پر بھی سکیورٹی اداروں سے رپورٹ مانگی گئی ہے۔
یاد رہےکہ الیکشن کمیشن نے حیدرآباد کے 9 اضلاع میں بارشوں اور سیلابی صورتحال کے پیش نظر بلدیاتی الیکشن کے دوسرے مرحلے کے تحت 28 اگست کو ہونے والی پولنگ ملتوی کردی ہے۔
