27 اگست ، 2022 
شہباز گِل کی اسلحہ برآمدگی کیس میں ضمانت منظور
27 اگست ، 2022
اسلام آباد کی ڈسٹرکٹ اینڈ سیشن کورٹ نے پاکستان تحریک انصاف کے رہنما شہباز گِل کی اسلحہ برآمدگی کے کیس میں ضمانت منظور کرلی۔
اسلام آباد کے جوڈیشل مجسٹریٹ اور ڈیوٹی جج نصیرالدین نے شہباز گل سے پستول کی برآمدگی کے مقدمے میں ضمانت کی درخواست پر سماعت کی۔
تفتیشی افسر نے کہا کہ ہم نے پستول برآمد کر کے فوری مقدمہ درج نہیں کیا بلکہ رپورٹ لکھ کر وقت دیا کہ شہباز گل کا ڈرائیور خود یا پستول کا لائسنس آ جائے، ایک دن انتظار کے بعد پیش نہ ہونے پر ہم نے مقدمہ درج کیا۔
شہباز گل کے وکیل علی بخاری کا کہناتھاکہ جو پستول برآمد کیا گیا وہ شہباز گل کے ڈرائیور کا ہے جس کا لائسنس بھی ہے اور پولیس کو فراہم کر دیا گیا ہے۔
تفتیشی افسر نے کہا کہ اسے ابھی تک لائسنس فراہم نہیں کیا گیا۔
عدالت نے دلائل سننے کے بعد 25 ہزار روپے کے مچلکوں پر شہباز گل کی ضمانت منظور کر لی۔
