25 نومبر ، 2012 
کراچی ، پشاوراور کوئٹہ سمیت کئی شہروں میں موبائل سروس بحال
25 نومبر ، 2012
اسلام آباد … وفاقی وزیر داخلہ رحمان ملک نے کہا ہے کہ جن شہروں میں جلوس ختم ہوگئے وہاں موبائل فون سروس کھول دی جائے، حکومتی ہدایت کے بعد پشاور اور کوئٹہ سمیت متعدد شہروں میں موبائل فون سروس بحال ہوگئی۔ وفاقی وزیر داخلہ رحمان نے پاکستان ٹیلی کام اتھارٹی کو ہدایت کی ہے کہ جن شہروں میں یوم عاشورکے جلوس ختم ہوگئے وہاں موبائل فون سروس کھول دی جائے۔ انہوں نے کہا ہے کہ جہاں جہاں محرم الحرام کے جلوس ختم نہیں ہوئے وہاں موبائل سروس بند رہے گی۔ وزیر داخلہ کی ہدایت کے بعد پشاور ، کوئٹہ، حب، مانسہرہ، خضدار اور ڈیرہ مراد جمالی میں موبائل فون سروس بحال ہوگئی ہے جبکہ بعض شہروں میں اب بھی موبائل فون سروس بند ہے،البتہ کراچی میں موبائل سروس کھلنا شروع ہوگئے ہیں۔ واضح رہے کہ کراچی سمیت ملک بھر کے 52 شہروں میں محرم الحرام پر سیکیورٹی خدشات کے باعث موبائل فون سروس بند کی گئی ہے۔
