14 اکتوبر ، 2022 
کیا مردان وارئیرز کے حسیب خان رضوان کے رشتے دار ہیں؟
14 اکتوبر ، 2022
پاکستان جونئیر لیگ کی ٹیم مردان وارئیرز کے بیٹنگ آل راؤنڈر حسیب خان سب کی توجہ کا مرکز بنے ہوئے ہیں جس میں ایک وجہ تو ان کی کارکردگی ہے اور دوسری وجہ ان کی وکٹ کیپر بیٹر محمد رضوان سے مشابہت ہے۔
حسیب خان کا تعلق پشاور سے ہے اور ان کی شکل محمد رضوان سے کافی ملتی ہے، ساتھ ہی حسیب میدان میں شاٹس بھی رضوان کی طرح کھیلنے کی کوشش کرتے ہیں یہ ہی وجہ ہے کہ لوگ انہیں محمد رضوان کا رشتہ دار سمجھتے ہیں۔
حسیب خان نے جیو نیوز سے گفتگو کرتے ہوئے بتایا کہ محمد رضوان میرے کچھ نہیں لگتے، وہ بس میرے پسندیدہ کھلاڑی ہیں اور مجھے ان کی طرح بننا ہے اور ان ہی کی طرح بیٹنگ کرنی ہے۔
انہوں نے کہا کہ رضوان کی بیٹنگ کو دیکھ کر بہت مزہ آتا ہے، ان کی اننگز کو مس نہیں کرتا کیونکہ اس سے بہت کچھ سیکھتا ہوں، مجھے ان کی طرح اننگز کھیلنا ہیں جو پاکستان کے کام آئیں۔
مردان وارئیرز کے مینٹور شاہد خان آفریدی ہیں اور حسیب خان لیگ اسپن بولر بھی ہیں۔
حسیب کا کہنا ہے کہ شاہد آفریدی کا ساتھ بہت کام آ رہا ہے، وہ مجھے بولنگ کے بارے میں بہت بتاتے ہیں جو میرے کام آرہا ہے۔
