20 اکتوبر ، 2022 
کراچی فائرنگ سے شہری جاں بحق، زخمی پولیس اہلکار ایمبولینس نہ ملنے پر جانبر نہ ہوسکا
20 اکتوبر ، 2022
کراچی میں بڑا بورڈ کے علاقے میں ڈاکوؤں کی فائرنگ سے زخمی پولیس اہلکار ایمبولینس نہ ملنے کے بعد زندگی کی جنگ ہار گیا، جبکہ ڈاکوؤں کی فائرنگ سے ایک شہری بھی جاں بحق ہو گیا۔
کراچی کے علاقے بڑا بورڈ کے قریب مقابلے میں پولیس اہلکار کے زخمی ہونے کی وِیڈیو جیو نیوز کو موصول ہوئی ہے جس میں اہلکار نہال زخمی حالت میں زمین پر گرا ہوا ہے، ساتھی اہلکار اور لوگ اسے اٹھانے کی کوشش کرتے دیکھے جاسکتے ہیں۔
زخمی اہلکارنہال کو اسپتال منتقل کرنے کیلئے بروقت ایمبولینس تک نہ پہنچی جس پر ساتھی اہلکار اسے موٹرسائیکل پر لیکر روانہ ہوئے، تاہم وہ جانبر نہ ہوسکا۔
ویڈیو میں یہ بھی واضح دیکھا جا سکتا ہے کہ زخمی اہلکار نہال اور ساتھی اہلکاروں میں کوئی بھی بلیٹ پروف جیکٹ پہنے ہوئے نہیں تھا۔
ایس ایس پی کیماڑی کیپٹن فیضان نے دعویٰ کیا کہ شہید پولیس اہلکار سمیت تینوں کے پاس بلٹ پروف جیکٹس موجود تھیں لیکن انہوں نے کھانے کے دوران انہیں اتار کر ہوٹل پر رکھ دیا تھا، اچانک فائرنگ کی آواز سن کر تینوں پولیس اہلکارشہری کو بچانے نکلے تو مقابلہ ہوگیا۔
فلاحی ادارے کا موقف ہے کہ جیسے ہی اطلاع ملی تو ایمبولینس روانہ کی گئی اور آدھے راستے سے اہلکار کو موٹرسائیکل سے ایمبولینس میں منتقل کرکے اسپتال لایا گیا۔
پولیس کے مطابق ڈاکوؤں کی فائرنگ سے پولیس اہلکار اور شہری کے ہلاکت کے واقعے کا مقدمہ پاک کالونی تھانے میں درج کرلیا گیا ہے۔
