30 اکتوبر ، 2022 
کراچی میں نامعلوم افراد کی فائرنگ سے پولیس اہلکار زخمی
30 اکتوبر ، 2022
کراچی میں نیپا چورنگی کے قریب نامعلوم افراد کی فائرنگ سے گلستان جوہر تھانے میں تعینات اے ایس آئی زخمی ہوگیا۔
پولیس کے مطابق اے ایس آئی غلام مصطفیٰ سادہ کپڑوں میں نیپا چورنگی سے گزر رہا تھا کہ نامعلوم ملزمان نے فائرنگ کر کے اسے زخمی کردیا۔
پولیس کا کہنا ہے کہ زخمی اہلکار گلستان جوہر تھانے میں تعینات ہے، زخمی اہلکار واقعہ سے متعلق بیان نہیں دے سکا، بیان لینے کے بعد واقعہ کا مقدمہ درج کیا جائیگا۔
پولیس کے مطابق عینی شاہدین نے بتایا کہ موٹرسائیکل سوار 2 ملزمان اہلکار پر فائرنگ کرکے فرار ہوگئے۔
واقعہ عزیز بھٹی تھانے کی حدود میں پیش آیا ہے جہاں زخمی اہلکار کئی سال تعینات رہ چکا ہے اور متعدد ملزمان کو گرفتار بھی کروا چکا ہے، زخمی اہلکار اسٹیڈیم روڈ پر واقع نجی اسپتال میں زیر علاج ہے۔
