18 دسمبر ، 2022 
75 سال بعد بھی سوچ رہے ہیں پاکستان کیسے چلے گا؟ گورنر سندھ
18 دسمبر ، 2022
گورنر سندھ کامران ٹیسوری نے کہا ہے کہ 75 سال بعد بھی سوچ رہے ہیں کہ پاکستان کیسے چلے گا؟
جناح سندھ میڈیکل یونیورسٹی کے چوتھے کانووکیشن میں 630 طلبہ و طالبات کو ڈگریاں تفویض کی گئیں جبکہ 40 طلبہ وطالبات کو اعلیٰ کارکردگی پر میڈلز سے نوازا گیا۔
کانووکیشن میں وائس چانسلر جناح سندھ میڈیکل یونیورسٹی پروفیسر امجد سراج میمن، صوبائی وزیر اسماعیل راہو اور اساتذہ سمیت والدین نے بھی شرکت کی۔
مہمان خصوصی گورنر سندھ کامران خان ٹیسوری نے پوزیشن ہولڈرز میں میڈلز تقسیم کیے۔
شرکا سے خطاب میں گورنر سندھ کامران خان ٹیسوری کا کہناتھا کہ 75 سال بعد بھی سوچ رہے ہیں کہ پاکستان کیسے چلے گا؟ ہر کوئی یہاں سے باہر جانا چاہتا ہے، والدین جن کے بچے باہر پڑھ رہے ہیں، ان کو ڈالر ریٹ کی فکر ہے۔
اس موقع پرخطاب کرتے ہوئے وائس چانسلر پروفیسر امجد سراج میمن نے جناح سندھ میڈیکل سٹی بنانے کے عزم کا اظہار کیا اور موجودہ سہولتوں کی توسیع کے لیے یونیورسٹی کودرکار جگہ کی ضرورت پر روشنی بھی ڈالی۔
