20 جنوری ، 2023 
پنجاب کے الیکشن میں ن لیگ اکثریت حاصل کرے گی: رانا ثنا کا دعویٰ
20 جنوری ، 2023
وفاقی وزیر داخلہ رانا ثنا اللہ نے مخالفین پر تنقید کرتے ہوئے کہا کہ پی ٹی آئی والوں کے کالے کرتوت سب کے سامنے آرہے ہیں۔
لندن میں میڈیا سے گفتگو کے دوران عمران خان کی گرفتاری سے متعلق سوال پر رانا ثنا اللہ کا کہنا تھا کہ کسی کی گرفتاری کا فیصلہ حکومت کا نہیں تحقیقاتی اداروں کا ہوگا۔
دوران گفتگو رانا ثنا اللہ نے دعویٰ کیا کہ پنجاب کے الیکشن میں ن لیگ ناصرف کامیاب ہو گی بلکہ اکثریت حاصل کرے گی۔
ان کا کہنا تھا ابھی پنجاب میں الیکشن کا شیڈول جاری نہیں ہوا، ہو سکتا ہے انتخابات 3 ماہ میں نہ ہوں تاہم یہ واضح ہے کہ ن لیگ نواز شریف کی قیادت میں انتخابی مہم شروع کرے گی، ووٹ اور سپورٹ نواز شریف کی ہے اس لیے ان کی وطن واپسی ضروری ہے۔
دوسری جانب وفاقی وزیر جاوید لطیف کا کہنا تھا کہ حکومت ملے 7، 8 ماہ نہیں صرف ڈیڑھ ماہ ہوا ہے، اصل آزادانہ حکومت 23 نومبر کے بعد وجود میں آئی ہے۔
