01 مارچ ، 2023 
چارسدہ: انسداد بحالی منشیات سینٹر میں مریضوں کو منشیات دیے جانے اور جنسی زیادتی کا انکشاف
01 مارچ ، 2023
چارسدہ میں منشیات کے عادی افراد کی بحالی کے لیے قائم نجی مرکز میں علاج کی بجائے مریضوں کو منشیات دیے جانے اور جنسی زیادتی کا نشانہ بنائے جانے کا انکشاف ہوا ہے۔
محکمہ ایکسائز حکام کے مطابق چارسدہ کے علاقے مندنی میں نشے میں مبتلا افراد کے لیے قائم بحالی مرکز پر چھاپے کے دوران نجی بحالی مرکز سے 508 گرام ہیروئن اور 462 گرام آئس برآمد کی گئی۔
پولیس حکام کا بتانا ہے کہ متعلقہ نجی بحالی مرکز کے مالک اور منیجر کو گرفتار کر لیا گیا ہے، بحالی مرکز سے اسلحہ بھی برآمد کیا گیا۔
محکمہ ایکسائز کے مطابق بحالی مرکز میں منشیات کے عادی افراد کو علاج کی بجائے منشیات فراہم کی جاتی تھیں، بحالی مرکز کے مالک اور منیجر نے نشہ دینے کا لالچ دے کر بچوں سے جنسی زیادتی کا اعتراف بھی کیا۔
حکام محکمہ ایکسائز کا بتانا ہے کہ ملزمان نے 12 کم عمر بچوں کو نجی بحالی مرکز میں جنسی زیادتی کا نشانہ بنایا، نجی بحالی مرکز سے نشے میں مبتلا 2 کم عمر بچوں کو بھی بازیاب کرایا گیا۔
