صحت و سائنس

آج کل کی وہ عام عادت جو آپ کو موٹاپے کا شکار بنا دیتی ہے

ویب ڈیسک

03 مارچ ، 2023

یہ انکشاف ایک نئی تحقیق میں سامنے آیا / فائل فوٹو

کیا آپ اپنے جسمانی وزن میں اضافے کی وجہ سے پریشان ہیں اور اس میں کمی لانے کی کوششیں ناکام ہو رہی ہیں؟

تو اس کی وجہ آپ کی اپنی ایک عام عادت ہوسکتی ہے۔

یہ بات ایک نئی طبی تحقیق میں سامنے آئی۔

امریکا کی ہارورڈ یونیورسٹی اور کینیڈا کی ٹورنٹو یونیورسٹی کی مشترکہ تحقیق میں دریافت کیا گیا کہ میٹھے مشروبات جیسے سوڈا پینے کے نتیجے میں جسمانی وزن میں اضافہ ہوتا ہے۔

اس تحقیق میں گزشتہ دہائی کے دوران ہونے والی درجنوں تحقیقی رپورٹس کے ڈیٹا کا تجزیہ کیا گیا۔

تحقیق میں دریافت ہوا کہ میٹھے مشروبات کے استعمال اور موٹاپے کے درمیان تعلق موجود ہے۔

خیال رہے کہ جسمانی وزن میں اضافے اور موٹاپے سے ذیابیطس، امراض قلب، کینسر اور دیگر امراض کا خطرہ بڑھ جاتا ہے۔

تحقیق کے مطابق میٹھے مشروبات کے استعمال، جسمانی وزن میں اضافے اور دائمی امراض کے درمیان تعلق ثابت ہوتا ہے۔

محققین نے مجموعی طور پر 85 تحقیقی رپورٹس کے ڈیٹا کی جانچ پڑتال کی تھی جن میں 5 لاکھ سے زیادہ افراد کو شامل کیا گیا تھا۔

نتائج سے معلوم ہوا کہ روزانہ ایک اضافی سوڈا پینے سے جسمانی وزن میں اضافہ ہوتا ہے۔

محققین نے بتایا کہ جتنی زیادہ مقدار میں میٹھے مشروبات کا استعمال کیا جائے، جسمانی وزن میں اتنا زیادہ اضافہ ہوگا۔

درحقیقت انہوں نے بتایا کہ روزانہ صرف ایک سوڈا پینے سے ایک سال میں جسمانی وزن میں آدھا کلو کے قریب اضافہ ہو جاتا ہے۔

محققین کا کہنا تھا کہ بظاہر یہ کوئی خاص اضافہ محسوس نہیں ہوتا مگر بتدریج یہ بہت زیادہ ہو جاتا ہے، تو بہتر یہ ہے کہ میٹھے مشروبات کا استعمال کم از کم کیا جائے۔

تحقیق میں بتایا گیا کہ موجودہ عہد میں میٹھے مشروبات کا استعمال اب بہت زیادہ ہوتا ہے اور ان مشروبات میں چینی کی مقدار کافی زیادہ ہوتی ہے، جس کے نتیجے میں موٹاپے کی وبا تیزی سے پھیل رہی ہے۔