کھجور کھانے سے صحت کو کیا فائدے ہوتے ہیں؟

ویب ڈیسک

24 مارچ ، 2023

کھجور وہ پھل ہے جو پورا سال آسانی سے دستیاب ہوتا ہے / فائل فوٹو

کھجور وہ پھل ہے جس کا استعمال بہت زیادہ کیا جاتا ہے، خاص طور پر رمضان کے مہینے میں تو روزانہ ہی اسے کھایا جاتا ہے۔

مگر کیا یہ پھل صحت کے لیے مفید ہوتا ہے؟ اس کا جواب ہاں ہے۔

کھجوروں میں قدرتی مٹھاس کافی زیادہ ہوتی ہے مگر اس کے ساتھ ساتھ یہ پھل متعدد اقسام کے غذائی اجزا سے بھرپور ہوتا ہے۔

تو اگر اعتدال میں رہ کر کھایا جائے تو یہ پھل ایک اچھا انتخاب ہے۔

اچھی بات یہ ہے کہ کھجوریں پورا سال آسانی سے دستیاب ہوتی ہیں اور ان کو کھانے سے آپ درج ذیل فوائد حاصل کر سکتے ہیں۔

بہت زیادہ مقوی

کھجوروں میں متعدد غذائی اجزا ہوتے ہیں جیسے پروٹین، کاربوہائیڈریٹس، فائبر، وٹامن اے، وٹامن بی 6، کاپر، میگنیشم، پوٹاشیم اور Manganese جیسے اجزا اس میں موجود ہوتے ہیں۔

اس کے ساتھ ساتھ فینولک ایسڈز (یہ اینٹی آکسائیڈنٹس ہوتے ہیں)، کیروٹین اور کئی طرح کے کیمیائی مرکبات بھی کھجوروں کا حصہ ہوتے ہیں۔

چونکہ یہ پھل اینٹی آکسائیڈنٹس سے بھرپور ہوتا ہے تو صحت کے لیے متعدد پہلوؤں سے مفید ثابت ہوتا ہے۔

فائبر سے بھرپور

غذا میں مناسب مقدار میں فائبر کے استعمال سے صحت کو بہت زیادہ فائدہ ہوتا ہے۔

کھجوروں میں موجود فائبر سے نظام ہاضمہ بہتر ہوتا ہے اور قبض سے بچنا آسان ہو جاتا ہے۔

اس کے ساتھ ساتھ فائبر سے بلڈ شوگر کو کنٹرول کرنے میں بھی مدد ملتی ہے، کیونکہ اس غذائی جز سے غذا کے ہضم ہونے کا عمل سست ہوتا ہے جس سے بلڈ شوگر کی سطح میں بہت تیزی سے اضافہ نہیں ہوتا۔

یہی وجہ ہے کہ بلڈ شوگر کی سطح میں اضافہ کرنے والی غذاؤں کی فہرست میں کھجور کافی نیچے موجود ہے۔

امراض سے لڑنے والے اینٹی آکسائیڈنٹس

کھجوروں میں ایسے اینٹی آکسائیڈنٹس کی مقدار کافی زیادہ ہوتی ہے جو صحت کے لیے مفید ہوتے ہیں اور متعدد امراض کا خطرہ کم ہوتا ہے۔

اینٹی آکسائیڈنٹس خلیات کو جسم میں گردش کرنے والے غیر مستحکم مرکبات سے تحفظ فراہم کرتے ہیں۔

کھجوروں میں موجود اینٹی آکسائیڈنٹس ذیابیطس، الزائمر، کینسر کی مخصوص اقسام، عمر کے ساتھ بینائی میں آنے والی کمی اور امراض قلب سے تحفظ فراہم کر سکتے ہیں۔

دماغی صحت کے لیے بھی مفید

کھجور کھانے کی عادت سے دماغی افعال کو بہتر بنانے میں مدد مل سکتی ہے۔

تحقیقی رپورٹس سے ثابت ہوا ہے کہ کھجوروں سے دماغ میں ورم کا باعث بننے والے عناصر کی سطح کم ہوتی ہے جس سے مختلف امراض جیسے الزائمر کا خطرہ کم ہوتا ہے۔

جانوروں پر ہونے والی تحقیق میں دریافت کیا گیا کہ کھجور کھانے سے یادداشت اور سیکھنے جیسی دماغی صلاحیتیں بہتر ہوتی ہیں جبکہ انزائٹی جیسے رویوں کی شدت میں کمی آتی ہے۔

اس حوالے سے انسانوں پر مزید تحقیق کی ضرورت ہے۔

چینی کا متبادل

کھجوروں میں قدرتی مٹھاس کافی زیادہ ہوتی ہے اور اسی وجہ سے یہ پھل چینی کا اچھا متبادل ہے کیونکہ اس میں غذائی اجزا، فائبر اور اینٹی آکسائیڈنٹس بھی موجود ہوتے ہیں۔

ہڈیوں کی صحت بہتر ہو سکتی ہے

کھجوریں فاسفورس، کیلشیئم اور میگنیشم سمیت متعدد منرلز سے لیس ہوتی ہیں اور یہ سب عمر بڑھنے کے ساتھ ہڈیوں میں آنے والی کمزوری کی روک تھام کے لیے اہم ہیں۔

بلڈ شوگر کنٹرول

اعتدال میں رہ کر کھجور کھانے سے بلڈ شوگر کی سطح میں بھی کمی آسکتی ہے۔

اس کی وجہ کھجوروں میں فائبر، اینٹی آکسائیڈنٹس اور دیگر اجزا کی موجودگی ہے۔

پوٹاشیم کی موجودگی

کھجوروں میں پوٹاشیم کی مقدار کافی زیادہ ہوتی ہے، یہ غذائی جز بلڈ پریشر کو کنٹرول کرنے کے لیے بہت اہم ہوتا ہے، جس سے امراض قلب کا خطرہ کم ہوتا ہے۔

اس کے ساتھ ساتھ پوٹاشیم سے جسم کو مسلز بنانے میں مدد ملتی ہے۔

بانجھ پن سے ممکنہ تحفظ

اس حوالے سے بہت زیادہ تحقیقی کام تو نہیں ہوا مگر چوہوں پر ہونے والی ایک تحقیق میں دریافت کیا گیا کہ کھجور کھانے سے بانجھ پن کی علامات میں کمی آ سکتی ہے۔