پی ٹی آئی کو 26 مارچ کو مینار پاکستان پر جلسے کی اجازت مل گئی
22 مارچ ، 2023
پاکستان تحریک انصاف کو 26 مارچ کو مینار پاکستان پر جلسے کی اجازت مل گئی۔
گزشتہ روز پی ٹی آئی لاہور کے صدر شیخ امتیاز نے مینار پاکستان پر جلسہ کرنے کی اجازت کے لیے ضلعی انتظامیہ کو درخواست جمع کرائی تھی۔
تاہم اب پی ٹی آئی کو 26 مارچ کو مینار پاکستان پر جلسے کی اجازت مل گئی جس کا نوٹیفکیشن بھی جاری کردیا گیا ہے۔
اجازت نامہ کے مطابق جلسہ انتظامیہ ہی اسٹیج، خواتین اور تمام انکلوژرز کی سکیورٹی کی ذمہ دار ہوگی،جلسے میں عدلیہ اور اداروں کے خلاف تقاریر کی اجازت نہیں ہوگی۔
واضح رہے کہ لاہور ہائی کورٹ نے جلسے کی اجازت سے متعلق درخواست پر آج رپورٹ طلب کر رکھی ہے اور ڈی سی ، سی سی پی او کو بھی آج طلب کیا گیا ہے۔
