17 اپریل ، 2023 
علی زیدی 3 روزہ جسمانی ریمانڈ پر پولیس کے حوالے
17 اپریل ، 2023
جوڈیشل مجسٹریٹ ملیر کراچی کی عدالت نے علی زیدی کیس کا تحریری حکم نامہ جاری کردیا۔
عدالت کا کہنا ہے کہ ریکارڈ سے پتہ چلتا ہے کہ ملزم کو مخصوص کردار اور الزام پر مقدمہ میں نامزد کیا گیا، عارضی طور پر مدعی اور ملزم کے درمیان 17 کروڑ روپے کی بھاری ٹرانزیکشن ہوئی ہے، علی زیدی کو مدعی مقدمہ کی نشاندہی پر گرفتار کیا گیا ہے، مدعی مقدمہ کے وکیل نے ایگریمنٹ، لیز ڈاکیومنٹ اور پے آرڈرز پیش کیے، مدعی مقدمہ کے شواہد کی روشنی میں ملزم سے گٹھ جوڑ دکھائی دیتا ہے۔
عدالت کا کہنا ہے کہ ضابط فوجداری کی سیکشن 63 کے تحت کیس کو خارج کرنے کی درخواست مسترد کی جاتی ہے، ملزم جعل سازی اور بھاری نقصان میں ملوث ہے، اس سے ہمارے معاشرے پر برے اثرات مرتب ہوتے ہیں، 24 گھنٹوں میں اس کیس کی تفتیش مکمل نہیں ہوسکتی ہے، کیس کے تفتیشی افسر اس کی شفاف تحقیقات کریں اور حقائق سامنے لائیں، ملزم علی زیدی کو 3 روزہ جسمانی ریمانڈ پر پولیس کے حوالے کیا جاتا ہے، تفتیشی افسر شفاف، غیرجانبدار تحقیقات کرکے پیش رفت رپورٹ پیش کریں، علی زیدی کو 20 اپریل کو دوبارہ عدالت میں پیش کیا جائے۔
