Election 2024 Election 2024

نظر کی کمزوری کا اشارہ دینے والی عام علامات

بینائی کی کمزوری بتدریج بڑھتی ہے / فائل فوٹو
بینائی کی کمزوری بتدریج بڑھتی ہے / فائل فوٹو

بینائی کمزور ہونے کا عمل وقت کے ساتھ بتدریج آگے بڑھتا ہے اور اکثر اس کا علم کافی تاخیر سے ہوتا ہے۔

البتہ جب چند علامات کا مسلسل سامنا ہوتا ہے تو معلوم ہوتا ہے کہ آپ کی دور یا قریب کی نظر کمزور ہو چکی ہے اور چشمے کی ضرورت ہے۔

اس سے ہٹ کر بھی آنکھ یا عدسے کے نقص کی وجہ سے بھی بینائی کمزور ہو جاتی ہے۔

تو ایسی عام علامات کے بارے میں جانیں جن سے معلوم ہوتا ہے کہ آپ کو چشمے کی ضرورت ہے۔

کچھ دیکھتے ہوئے آنکھیں سکیڑنا

کیا اس مضمون کو پڑھتے ہوئے آنکھیں سکیڑ لی ہیں؟ اگر ہاں تو آنکھیں کھول کر دیکھیں کیا الفاظ معمولی دھندلے تو نظر نہیں آ رہے؟ اگر ہاں تو پھر ہو سکتا ہے کہ آپ کو چشمے کی ضرورت ہے۔

کسی چیز پر توجہ مرکوز کرنے کے دوران آنکھیں سکیڑنا ایک قدرتی ردعمل ہوتا ہے جس سے آنکھ کا عدسہ اپنی ساخت بدل لیتا ہے اور کم روشنی آنکھوں میں داخل ہوتی ہے جس سے چیزیں صاف نظر آتی ہیں۔

مگر مسلسل آنکھیں سکیڑے رکھنا بینائی کی کمزوری کی چند بڑی علامات میں سے ایک ہے۔

دھندلا نظر آنا

دھندلا نظر آنا بھی بینائی میں کمزوری کی چند بڑی علامات میں سے ایک ہے۔

قریب یا دور کی نظر کمزور ہونے پر دھندلا نظر آنے لگتا ہے اور ڈاکٹر کے پاس جاکر چیک اپ کرانا ضروری ہوتا ہے۔

آنکھوں میں تکلیف

آنکھوں میں تکلیف کا سامنا متعدد وجوہات کے باعث ہو سکتا ہے جیسے کمرے کی ناقص روشنی، تناؤ اور تھکاوٹ۔

مگر مسلسل کمپیوٹر استعمال کرنے اور بینائی کے کسی مسئلے کے باعث بھی ایسا ہوتا ہے۔

اگر ایسا بینائی کی کمزوری کے باعث ہو رہا ہے تو اس کے ساتھ آنکھیں سکیڑنے والی علامت بھی نظر آئے گی۔

آنکھوں میں مسلسل تکلیف ہو تو ڈاکٹر سے رجوع کرکے چیک اپ کرانا چاہیے تاکہ وجہ کا تعین ہو سکے۔

کتاب کو بہت زیادہ قریب سے پڑھنا

اگر آپ کو احساس ہو کہ آپ کتاب یا اخبار کو معمول سے زیادہ قریب لا کر پڑھ رہے ہیں تو یہ بھی نظر کی کمزوری ہو سکتی ہے۔

عمر بڑھنے کے ساتھ عموماً ایسا ہوتا ہے اور چشموں کے استعمال سے اس پر قابو پانے میں مدد مل سکتی ہے۔

رات کو دیکھنے میں مشکلات

رات کو چیزیں نظر آنے میں مسائل کا سامنا ہوتا ہے تو یہ بھی چشمے کی ضرورت کی ایک نشانی ہو سکتی ہے۔

ایسا متعدد وجوہات کے باعث ہو سکتا ہے جیسے قریب کی نظر کمزور ہونے یا دور کی نظر خراب ہونے پر بھی ایسا ہو سکتا ہے۔

سنگین کیسز میں یہ مسئلہ موتیے کی علامت بھی ہو سکتا ہے۔

روشنی میں آنے والی تبدیلی سے آنکھوں کو ایڈجسٹ کرنے میں وقت لگنا

ہماری آنکھیں روشنی میں آنے والی تبدیلیوں کے مطابق آسانی سے ایڈجسٹ ہو جاتی ہیں۔

تاہم اگر آنکھوں کو روشنی سے مطابقت پیدا کرنے میں معمول سے زیادہ وقت لگ رہا ہو تو ڈاکٹر سے رجوع کرنا چاہیے۔

مسلسل سر درد رہنا

سر درد کی متعدد وجوہات ہو سکتی ہیں جیسے جسم میں پانی کی کمی، غذا، تناؤ اور ہارمون، مگر بینائی کے مسائل بھی سر درد کا باعث بنتے ہیں۔

مگر بینائی کے مسئلے کے شکار افراد کے لیے یہ جاننا بہت مشکل ہوتا ہے کہ سر درد آنکھوں کی کمزوری کا نتیجہ ہے، تو اگر سر درد کے ساتھ چیزیں دیکھتے ہوئے آنکھیں سکیڑ رہے ہیں یا کتاب کو چہرے کے قریب لا کر پڑھ رہے ہیں تو ہو سکتا ہے کہ آپ کو چشمے کی ضرورت ہو۔

ہالے بننا

کیا رات کو روشنی پھیلتی ہوئی محسوس ہوتی ہے جیسے کسی چیز کے گرد ہالہ بن گیا ہو؟ اگر روشنی کے گرد ہالہ نظر آ رہا ہے تو یہ بھی چشمے کی ضرورت ظاہر کرنے والی نشانی ہے۔

ایسا قریب یا دور کی نظر میں کمزوری کے باعث بھی ہو سکتا ہے جبکہ یہ موتیے کے مرض کی بھی ایک علامت ہو سکتی ہے۔

نوٹ: یہ مضمون طبی جریدوں میں شائع تفصیلات پر مبنی ہے، قارئین اس حوالے سے اپنے معالج سے بھی ضرور مشورہ کریں۔

مزید خبریں :