کراچی … ڈیفنڈر سعادت حسین کی غلطی کی وجہ سے پریمیئر لیگ فٹ بال میں زرعی ترقیاتی بینک نے کے پی ٹی کو شکست دیدی۔ سعادت حسین نے اپنے ہی گول پوسٹ میں گیند پھینک کر مخالف ٹیم کو برتری دلادی۔ کے پی ٹی فٹ بال اسٹیڈیم پر کھیلے جانے والے میچ میں زرعی ترقیاتی بینک نے 2-1 سے فتح حاصل کی۔ کے پی ٹی کے ڈیفنڈر سعادت حسین نے میچ کے 34 ویں منٹ میں اپنے ہی گول پوسٹ میں بال پھینک دیا جس کی وجہ سے زیڈ ٹی بی ایل کو نہ صرف ایک گول کا فائدہ ہوا بلکہ اسے ایک صفر کی برتری بھی حاصل ہوگئی۔ پہلے ہاف کے اختتام پر زیڈ ٹی بی ایل کی برتری برقرار رہی۔ میچ کا پہلا حقیقی گول دوسرے ہاف میں زیڈ ٹی بی ایل کے اسٹرائیکر افتخار علی خان نے 69 ویں منٹ میں کرکے اپنی ٹیم کی برتری 2-0 کردی۔ کے پی ٹی کی طرف سے واحد گول پنلٹی کک کے ذریعے اختر مومل نے میچ کے 75 ویں منٹ میں کیا۔ زیڈ ٹی بی ایل کے ڈیفنڈر محمد نوید کو میچ کے45 ویں منٹ میں اور کے پی ٹی کے اسٹرائیکر محمد کو میچ کے 53 ویں منٹ میں یلو کارڈ کا سامنا کرنا پڑا۔میچ کے بہترین اسکورر اختر علی خان اور بہترین کھلاڑی زیڈ ٹی بی ایل کے اسٹرائیکر حنیف خان قرار پائے۔ بدھ کو پریمئیرفٹ بال لیگ میں نیشنل بینک کا مقابلہ ووہیب ایف سی سے پی ٹی فٹ بال اسٹیڈیم کراچی میں جبکہ کے ای ایس سی کا مقابلہ پی ایم سی ایتھلیٹیکو ایف سی فیصل آباد کے درمیان پیپلز فٹ بال اسٹیڈیم کراچی میں کھیلا جائے گا۔