ویڈیو: قربانی کیلئے لایا گیا بیل بپھر کر ریسٹورنٹ میں گھس گیا
26 جون ، 2023
عید قرباں کے قریب آتے ہی ہرطرف قربانی کے جانوروں کی گہما گہمی ہے اس دوران گلیوں گلیوں گائے ، بیلوں کی رسی تھامے نوجوانوں کی بڑی تعداد نظر آتی ہے۔
یہ رونق بعض اوقات حادثات کا باعث بن بھی جاتی ہے، حال ہی میں کراچی میں قربانی کیلئے لائے بھاری بھر کم بیل کی پھرتی نے ڈی ایچ اے فیز 6 میں شہریوں کی دوڑیں لگوادیں۔
سوشل میڈیا پر کراچی کے علاقے ڈی ایچ اے کی ایک ویڈیو وائرل ہورہی ہے جس میں سڑک پر بپھرے بیل کو بھاگتے ہوئے ریسٹورنٹ میں گھستے دیکھا گیا۔
ویڈیو میں بیل کو ریسٹورنٹ کے گیٹ سے باآسانی اندر گھستے اور پھر چند افراد کو بیل کو باہر نکالتے دیکھا جاسکتا ہے۔
اس حوالے سے نجی میڈیا سےگفتگو کے دوران ریسٹورنٹ کے مالک نے بتایاکہ ملازم نے بیل ریسٹورنٹ کی جانب آتا دیکھ کر شیشے کا دروازہ بند کرنےکے بجائے کھلا رکھ کر عقلمندی کا مظاہرہ کیا، واقعے کے دوران ریسٹورنٹ میں موجود کسی بھی شخص یا سامان کو نقصان نہیں پہنچا۔
