کھیل

ارشد کی کامیابی کے بعد امید ہے ملک میں ایتھلیٹکس پر توجہ دی جائے گی: فاطمہ

28 اگست ، 2023

پاکستان کی ویمن جیولن تھرو چیمپئن فاطمہ حسین نے کہا کہ ارشد نے ثابت کردیا کہ وہ فائٹر پلیئر ہیں— فوٹو: فائل

ورلڈ ایتھلیٹکس چیمپئن شپ کے سلور میڈلسٹ ایتھلیٹ ارشد ندیم کے ساتھ ٹریننگ کرنیوالی اور پاکستان کی ٹاپ ویمن جیولن تھروور فاطمہ حسین کا کہنا ہے کہ ارشد ایک فائٹر کھلاڑی ہیں، انجری کے بعد انہوں نے شاندار کم بیک کیا، ارشد کی کامیاب پرفارمنس کے بعد امید ہے کہ ملک میں ایتھلیٹکس کو بھی توجہ دی جائے گی۔

ارشد ندیم نے گزشتہ شب ہنگری کے شہر بڈاپسٹ میں ورلڈ ایتھلیٹکس چیمپئن شپ کے فائنل میں 87.82 کی تھرو کے ساتھ سلور میڈل جیتا اور ورلڈ چیمپئن شپ میں میڈل جیتنے والے پہلے پاکستانی ایتھلیٹ بنے۔

ارشد کی پرفارمنس پر جیو نیوز سے گفتگو میں پاکستان کی ویمن جیولن تھرو چیمپئن فاطمہ حسین نے کہا کہ ارشد نے ثابت کردیا کہ وہ فائٹر پلیئر ہیں۔ فاطمہ کا کہنا تھا کہ وہ ارشد ندیم کے ساتھ ہی ٹریننگ کرتی ہیں، ارشد ندیم نے انجری کے بعد شاندار کم بیک کیا حالانکہ ورلڈ چیمپئن شپ کیلئے روانگی سے دس روز قبل انہیں گھٹنے میں مسئلہ ہوا تھا لیکن اس سے ان کی پرفارمنس پر اثر نہیں پڑا۔

نیشنل گیمز کی گولڈ میڈلسٹ فاطمہ حسین کا کہنا تھا کہ ارشد ندیم کی پرفارمنس سے پاکستان کی پوری ایتھلیٹکس فیملی کا نام روشن ہوگا اور امید ہے کہ اب ملک میں ایتھلیٹکس ، خاص طور پر جیولن تھرو کو بھی توجہ ملے گی۔

فاطمہ حسین نے کہا کہ ان کی خواہش ہے جس طرح ملک میں کرکٹ کو اسپانسرشپ ملتی ہے، ایتھلیٹکس کو بھی ایسے ہی اسپانسرشپ ملے تاکہ مزید کھلاڑی ملک کا نام روشن کرسکیں۔