پیاز کاٹنا ہمیں آنسو بہانے پر کیوں مجبور کر دیتا ہے؟

ویب ڈیسک

04 ستمبر ، 2023

پیاز کا استعمال تو انسان صدیوں سے کر رہے ہیں اور کہا جاتا ہے کہ قدیم مصر میں اس کی عبادت بھی کی جاتی تھی۔

لگ بھگ ہر کھانے کی تیاری کے لیے اسے استعمال کیا جاتا ہے۔

مگر اسے کاٹتے ہوئے لوگ آنسو بہانے پر کیوں مجبور ہو جاتے ہیں؟

درحقیقت کاٹنے والے کے ساتھ ساتھ اردگرد موجود افراد کے آنسو بھی بہنا شروع ہو جاتے ہیں۔

اس کی وجہ کافی دلچسپ ہے۔

جب پیاز کو کاٹا جاتا ہے تو اس میں سے متعدد مرکبات نکلتے ہیں جیسے allinase enzymes اور sulfoxides جو Sulfenic acid کی شکل اختیار کرلیتا ہے۔

یہ ایسڈ پیاز کی تیز مہک کا باعث بنتا ہے اور اسی کے باعث ہم آنسو بہانے پر بھی مجبور ہوتے ہیں۔

یہ ایسڈ فضا میں ایک گیس syn-propanethial-S-oxide کی شکل اختیار کرلیتا ہے اور یہ گیس جب ہماری آنکھوں میں پہنچتی ہے تو سب سے پہلے آنکھ کے پردے سے ٹکراتی ہے۔

جب یہ گیس وہاں پہنچتی ہے تو آنکھ کے پردے میں موجود تمام فائبر متحرک ہو کر غدود کو کہتے ہیں کہ اسے بہا کر خارج کر دے۔

اس کے نتیجے میں بار بار بار پلکیں جھپکنے لگتی ہیں اور آنسو بنتے ہیں جو اس گیس کو بہا کر خارج کرنا شروع کر دیتے ہیں۔

درحقیقت پیاز کو کاٹنے کے بعد محض 30 سیکنڈ میں آنسو بہنا شروع ہو جاتے ہیں۔

اگر پیاز کاٹنے کے دوران آنسو بہانے سے بچنا چاہتے ہیں تو اس سبزی کو کاٹنے سے قبل ٹھنڈا کر لیں جس سے کیمیائی ردعمل تبدیل ہو جاتا ہے اور کم گیس خارج ہوتی ہے۔

ایک طریقہ یہ ہے کہ پیاز کاٹنے کے وقت منہ میں ڈبل روٹی کا ایک ٹکڑا رکھ لیں، وہ ٹکڑا گیس کے بیشتر حصے کو اپنے اندر جذب کرلے گا۔

اسی طرح پیاز کاٹنے کے دوران چیونگم چبانے سے بھی آنسو بہانے سے بچنے میں کسی حد تک مدد مل سکتی ہے۔