صحت و سائنس

تناؤ جیسے عام مسئلے سے بچنا بہت آسان

04 دسمبر ، 2023

دائمی تناؤ صحت کے لیے نقصان دہ ہوتا ہے / فائل فوٹو

تناؤ کا سامنا ہم سب کو ہوتا ہے، یہاں تک کہ بچوں میں بھی اس کی علامات کو دیکھا جاسکتا ہے۔

روزمرہ کی مصروف زندگی ہو، مالی معاملات کا انتظام یا کسی رشتے دار سے خراب تعلق، تناؤ کی وجہ کچھ بھی ہوسکتی ہے۔

ویسے تو معمولی تناؤ نقصان دہ نہیں بلکہ انسان کو حالات سے مقابلہ کرنے میں مدد فراہم کرتا ہے، مگر بہت زیادہ یا دائمی تناؤ شخصیت پر جسمانی اور ذہنی اعتبار سے منفی اثرات مرتب کرسکتا ہے بلکہ مختلف امراض سے متاثر ہونے کا خطرہ بڑھتا ہے۔

یہی وجہ ہے کہ اس پر قابو پانے سے صحت اور شخصیت دونوں پر خوشگوار اثرات مرتب ہوتے ہیں۔

درحقیقت تناؤ کو کنٹرول میں رکھنے سے بلڈ پریشر اور بلڈ شوگر کی سطح مستحکم ہوتی ہے۔

تناؤ کو کنٹرول میں رکھنے کے چند بہترین اور آسان طریقے درج ذیل ہیں۔

چیونگم سے مدد لیں

اگر تناؤ محسوس ہو رہا ہے تو چیونگم کو چبا کر دیکھیں۔

تحقیقی رپورٹس کے مطابق چیونگم کھانے سے انزائٹی اور تناؤ میں کمی آتی ہے۔

ماہرین کے خیال میں جبڑے چلنے سے دماغ کی جانب سے خون کا بہاؤ بہتر ہوتا ہے جبکہ اس کی مہک اور ذائقے سے بھی پرسکون ہونے میں مدد ملتی ہے۔

گھر سے باہر نکلیں

گھر سے باہر وقت گزارنے سے بھی تناؤ میں کمی آتی ہے۔

کسی پارک یا کسی تفریحی مقام پر جانے یا گھر سے باہر نکل کر کچھ دیر تک چہل قدمی کرنے سے بھی تناؤ کو کنٹرول میں کرنے میں مدد ملتی ہے۔

مسکرانا مت بھولیں

اگر مشکل وقت کا سامنا ہو تو چہرے پر مسکراہٹ سے تناؤ گھٹ جاتا ہے۔

مسکرانے سے چہرے اور آنکھوں کے مسلز متحرک ہوتے ہیں جس سے تناؤ کے حوالے سے جسمانی ردعمل کی شدت گھٹ جاتی ہے۔

درحقیقت مسکراہٹ کی طرح ہونٹوں کو پھیلانے سے بھی یہی فائدہ ہوتا ہے جبکہ سچی مسکراہٹ سے دل کی دھڑکن کی رفتار کم ہوتی ہے جس سے بھی تناؤ پر قابو پانے میں مدد ملتی ہے۔