تیسرا ون ڈے: پاکستان ویمنز نے نیوزی لینڈکو سپر اوور میں ہرادیا

پاکستان ویمنز  کرکٹ ٹیم  نے نیوزی لینڈ  ویمنز  کو  تیسرے  ون ڈے  میں سپر اوور میں شکست دے دی۔

یہ دوسرا موقع ہےکہ پاکستان ویمنز  نے نیوزی لینڈ ویمنز کو  ون ڈے انٹرنیشنل میں شکست دی ہے۔

اس سے قبل اس کی واحد کامیابی نومبر 2017 میں شارجہ میں تھی جہاں اس نے ثنا میر کی 4 وکٹوں اور بسمہ معروف کے ناقابل شکست 36 رنز کی عمدہ کارکردگی کی بدولت 5 وکٹوں سے کامیابی حاصل کی تھی۔

نیوزی لینڈ نے موجودہ سیریز دو ایک سے اپنے نام کی ہے۔

یاد رہے کہ میزبان ٹیم نے پہلا ون ڈے 131رنز سے اور دوسرا ون ڈے ایک وکٹ سے جیتا تھا۔

تیسرے ون ڈے انٹرنیشنل میں نیوزی لینڈ ویمنز نے ٹاس جیت کر پہلے بیٹنگ کی اور مقررہ 50 اوورز  میں8 وکٹوں کے نقصان پر 251  رنز  بنائے، جواب میں پاکستان ویمنز  نے 50 اوورز  میں 9 وکٹوں پر 251 رنز بنائے اور  اسکور  برابر ہوگیا۔

سپر اوور میں پاکستان ویمنز  نے بغیر کسی نقصان کے 11 رنز اسکور کیے، عالیہ ریاض نے ایک چوکےکی مدد سے 8 رنز بنائے  اور  فاطمہ ثنا  نے 2 رنز  اسکور کیے۔

نیوزی لینڈ  ویمنز  کی ٹیم سعدیہ اقبال کے سپر اوور میں 8 رنز بناسکی لیکن اس کوشش میں اس کی دونوں بیٹرز  ایمیلیا کر اور سوفی ڈیوائن آؤٹ ہوگئیں۔

اس سے قبل نیوزی لینڈ ویمنز کی اننگز کی خاص بات ایمیلیاکر اور میڈی گرین کی عمدہ بیٹنگ تھی۔

ایمیلیا کر نے پانچ چوکوں کی مدد سے 77 رنز بنائے تھے، میڈی گرین نے تین چوکوں کی مدد سے 65 رنز کی اننگز کھیلی اور وہ آؤٹ نہیں ہوئیں۔

پاکستان ویمنز کی طرف سے نشرہ سندھو اور غلام فاطمہ نے دو، دو وکٹیں حاصل کیں۔

پاکستان ویمنز کو منیبہ علی کا 5 رنز کے انفرادی اسکور پر جلد نقصان اٹھانا پڑا۔ سدرہ امین پانچ چوکوں کی مدد سے24 رنز بناکر آؤٹ ہوئیں۔

بسمہ معروف اور عالیہ ریاض نے تیسری وکٹ کی شراکت میں 101 رنز کا اضافہ کیا، عالیہ ریاض چار چوکوں کی مدد سے 44 رنز بنا کر آؤٹ ہوئیں۔

پلیئر آف دی میچ بسمہ معروف نے ون ڈے انٹرنیشنل میں اپنی 20 ویں نصف سنچری اسکور کی،  وہ پانچ چوکوں کی مدد سے 68 رنز بنا کر آؤٹ ہوئیں۔

کپتان فاطمہ ثنا تین چوکوں کی مدد سے 36 رنز  بنا کر آؤٹ ہوئیں تو پاکستان ویمنز کو جیت کے لیے 55 رنز  درکار  تھے اور  اس کی 5  وکٹیں باقی تھیں۔

اس موقع پر نتالیہ پرویز  کے ایک چوکے اور  ایک چھکے کی مدد سے 26 رنز اور نجیہہ علوی کے ناقابل شکست 23 رنز پاکستان ویمنز کو جیت کے قریب لے آئے۔

پاکستان ویمنز کو  آخری اوور میں جیت کے لیے 8 رنز درکار تھے جب کہ آخری گیند پر جیت کے لیے 2 رنز بنانے تھے تاہم اس گیند پر نجیہہ علوی ایک رن بنانے میں کامیاب ہوسکیں اور یوں یہ میچ ٹائی ہوگیا جس کے بعد میچ کا نتیجہ سپر اوور میں پاکستان کے نام رہا۔

پاکستان ویمنز کرکٹ ٹیم نے نیوزی لینڈ کے اس دورے میں تین ٹی ٹوئنٹی انٹرنیشنل میچوں کی سیریز بھی کھیلی جو اس نے دو ایک سے جیتی۔

یہ پہلا موقع تھا کہ پاکستان ویمنز نے نیوزی لینڈ کی سرزمین پر ٹی ٹوئنٹی انٹرنیشنل سیریز جیتی۔