جاپان: حالیہ زلزلے سے ہلاکتوں کی تعداد 62 ہوگئی

جاپان میں یکم جنوری کو آنے والے زلزلے کے نتیجے میں اب تک ہلاکتوں کی تعداد 62 تک جا پہنچی ہے۔

غیر ملکی میڈیا کے مطابق نئے سال کے آغاز پر یکم جنوری کو وسطی جاپان میں 7.6 شدت کا زلزلہ ریکارڈ کیا گیا جس نے جاپان کے ساحلی علاقے کو نا صرف ہلا کر رکھ دیا بلکہ سونامی کے خطرے کو بھی بڑھا دیا۔

میڈیا رپورٹس کے مطابق زلزلے سے متاثرہ علاقے اشیکاوا میں ریسکیو اہلکاروں نے زلزلے سے متاثرہ افراد کی تلاش جاری رکھی ہوئی ہے تاہم انتظامیہ نے خبردار کیا ہےکہ شدید بارش، لینڈ سلائیڈنگ اور بار بار آفٹر شاکس امدادی سرگرمیوں میں رکاوٹ بن سکتے ہیں۔

جاپان میں 7.6 شدت کے زلزلے کے بعد سونامی کی وارننگ جاری

زلزلے کے جھٹکوں کے ساتھ سی آف جاپان کے ساحل کے مختلف حصوں پر ایک میٹر بڑی لہریں متحرک ہوئیں اور مزید بڑی لہروں کا امکان ہے۔

مقامی انتظامیہ کا کہنا ہے کہ یکم جنوری کو آنے والے زلزلے میں اب تک 62 افراد ہلاک ہوچکے ہیں جب کہ 300 کے قریب افراد زخمی ہیں جن میں 20 کی حالت تشویش ناک  ہے۔

مقامی انتظامیہ کے مطابق زلزلے کے بعد سے 31 ہزار 800 سے زائد افراد کو پناہ فراہم کی گئی ہے جب کہ ہلاکتوں کے مزید بڑھنے کا بھی خدشہ ظاہر کیا جارہا ہے۔

واضح رہے کہ زلزلے کے بعد جاپانی محکمہ موسمیات کی جانب سے اشیکاوا، نیگاتا اور تویاما نامی ساحلی علاقوں کے لیے سونامی وارننگ جاری کی گئی تھی جو بعد میں واپس لے لی گئی۔