14 جنوری ، 2024 
بجلی منافع کی مد میں وفاق کےذمے خیبرپختونخوا کے 3 کھرب روپے ہیں: نگران وزیرخرانہ
14 جنوری ، 2024
پشاور : نگران وزیر خرانہ خیبرپختونخوا رسول احمد بنگش کا کہنا ہے کہ خالص بجلی منافع کی مد میں وفاق کے ذمے صوبے کے3 کھرب روپے واجب الادا ہیں۔
جیو نیوز سے گفتگو کرتے ہوئے نگران وزیر خرانہ خیبرپختونخوا رسول احمد بنگش نے کہا کہ بقایاجات میں سے آدھے بھی مل جائیں تو ہمارا سلسلہ چل جائےگا، خالص بجلی منافع کی مد میں وفاق کےذمے خیبرپختونخوا کے 3 کھرب روپے ہیں۔
نگراں وزیرخزانہ کے پی کا کہنا تھا کہ این ایف سی ایوارڈ پر مکمل عمل درآمد نہیں ہو رہا، این ایف سی ایوارڈ کے تحت صوبے کو اس کا پورا حصہ نہیں مل رہا، این ایف سی ایوارڈ کے تحت ہمارا حصہ 14.62 فیصد بنتا ہے۔
رسول احمد بنگش کے مطابق قبائلی اضلاع کے ضم ہونے سے این ایف سی ایوارڈ مزید 5 فیصد بڑھ گیا ہے، فاٹا مرجر سے خیبرپختونخواکا نیشنل فنانس کمیشن ایوارڈ 19.64 فیصد بنتا ہے۔
نگران وزیر خزانہ خیبرپختونخوا نے مزید کہا کہ بی آرٹی کو پہلے اور دوسرے کوارٹر کے 2 ارب روپے دیے ہیں، بی آر ٹی کی مزید فنڈ کی ڈیمانڈ پر غور ہو رہا ہے۔
