15 جنوری ، 2024 
انتخابات کا التوا: سینیٹر دلاور خان کا اپنی قرارداد پر عملدرآمد کیلئے چیئرمین سینیٹ کو خط
15 جنوری ، 2024
اسلام آباد: سینیٹر دلاور خان نے عام انتخابات ملتوی کرانے کی قرارداد پر عملدرآمد کے لیے چیئرمین سینیٹ کو خط لکھ دیا۔
خیبرپختونخوا سے تعلق رکھنے والے آزاد سینیٹر دلاور خان نے چیئرمین سینیٹ کے نام لکھے گئے خط میں کہا ہے کہ یہ باعث تشویش ہےکہ الیکشن کمیشن نے تاحال 8 فروری کے انتخابات ملتوی کرانےکے کوئی اقدامات نہیں کیے۔
خط میں مزید کہا گیا ہےکہ قرارداد میں نشاندہی کیےگئے تحفطات پر توجہ دینی چاہیے تھی، بطور ایوان کےکسٹوڈین مداخلت کرکے میری قرارداد پر عملدرآمد کی موجودہ صورتحال معلوم کی جائے۔
خط میں کہا گیا ہےکہ یقینی بنایا جائے کہ 8 فروری کے انتخابات ملتوی کیے جائیں۔
واضح رہے کہ سینیٹر دلاور خان نے سب سے پہلے عام انتخابات ملتوی کرانے کی قرارداد سینیٹ میں پیش کی تھی جسے ایوان نے کثرت رائے سے منظور کیا، اس قرارداد کی منظوری کے وقت سینیٹ میں 14 سینیٹرز موجود تھے۔
اس کے علاوہ سینیٹ میں 8 فروری کو شیڈول الیکشن ملتوی کرانے کے لیے ایک اور قرارداد جمع کرائی گئی جو فاٹا سے تعلق رکھنے والے آزاد سینیٹر ہلال الرحمان نے جمع کرائی۔
