غصے سے بپھرے مسافر نے پرواز میں تاخیر کا اعلان کرتے پائلٹ کو تھپڑ جڑ دیا، ویڈیو وائرل

پاکستان سمیت بھارت اور دنیا بھر میں سردی کی وجہ سے پڑنے والی دھند کے باعث پروازیں تاخیر کا شکار ہیں اور مسافروں کو کئی کئی گھنٹوں تک کبھی جہاز تو کبھی ائیرپورٹ پر انتظار کرنا پڑ رہا ہے۔

بھارتی میڈیا رپورٹس کے مطابق ایک ویڈیو  منظر عام پر آئی ہے جو کہ انڈیگو طیارے کی ہے جس نے دہلی سے گوا کے لیے اڑان بھرنی تھی لیکن دھند کے باعث فلائٹ وقت پر روانہ نہ ہوسکی۔

ویڈیو میں دیکھا جاسکتا ہے کہ ایک مسافر غصے میں پائلٹ کی جانب بڑھا جو کہ تاخیر کا اعلان کررہا تھا، اعلان کرتے پائلٹ کو مسافر نے زوردار تھپڑ مارا جس سے وہ پیچھے ہٹ گیا۔

تھپڑ کے دوران مسافر اور پائلٹ کے درمیان ائیر ہوسٹس آگئی جس نے مسافر پر غصہ کا اظہار کیا۔

ائیر ہوسٹس نے مسافر سے مخاطب ہوتے ہوئے کہا کہ جو آپ نے کیا وہ انتہائی غلط تھا، سر آپ ایسا نہیں کرسکتے، جہاز میں سوار دیگر مسافروں نے انڈیگو کو فلائٹس میں تاخیر کا ذمہ دار ٹھہرایا اور ساتھ ہی مسافر کی عدم برداشت کی صفائی دینے کی کوشش بھی کی۔

مسافر کی شناخت ساحل کٹاریہ کے نام پر ہوئی جسے سکیورٹی فورسز کے حوالے کردیا گیا ہے۔ 

طیارے کے پائلٹ نے مسافر کے خلاف دہلی پولیس میں شکایت درج کرائی جس کی بنیاد پر کیس میں ایف آئی آر درج کی گئی ہے اور معاملے کی مزید تفتیش جاری ہے۔

ویڈیو سوشل میڈیا پر وائرل ہوئی تو صارفین نے مسافر پر سخت تنقید کی اور کہا کہ ان سب میں طیارے کا عملہ قصور وار نہیں ہے، انہیں جیسے ہدایات دی جاتی ہیں وہ ویسے ہی کام کرتے ہیں۔