10 فروری ، 2024 
30 گھنٹے بعد پتاچلا جس سیٹ پر جیت رہاتھا وہاں پیپلزپارٹی امیدوار کامیاب ہو گیا: خرم شیر زمان
10 فروری ، 2024
کراچی جنوبی 3 حلقہ این اے 241 کے غیر حتمی غیر سرکاری نتیجے سامنے آگئے، پاکستان پیپلز پارٹی کے مرزا اختیار بیگ نے پی ٹی آئی رہنما آزاد امیدوار خرم شیرزمان کو شکست دیدی۔
غیر حتمی اور غیر سرکاری نتائج کے مطابق پیپلزپارٹی کے امیدوار ڈاکٹر مرزا اختیار بیگ 52 ہزار 456 ووٹ لے کر کامیاب قرار پائے ہیں جبکہ حریک انصاف کے حمایت یافتہ آزاد امیدوار خرم شیر زمان 48 ہزار 610 ووٹ لے کر دوسرے نمبر پر رہے۔
حلقہ این اے 241 کے نتائج پر ردعمل دیتے ہوئے خرم شیر زمان کا کہنا تھا کہ 30 گھنٹے کے بعد آنے والے نتائج سے معلوم ہوا کہ جس نشست پر بھاری لیڈ کے ساتھ جیت رہا تھا وہاں پیپلز پارٹی کا امیدوار کامیاب ہو گیا ہے۔
انہوں نے کہا میں 70 سے 72 ہزار ووٹوں کی لیڈ سے یہ سیٹ جیت رہا تھا،دوسرے نمبر پرجماعت اسلامی ،تیسرے پر ایم کیو ایم اورچوتھے پرپیپلزپارٹی تھی۔
انہوں نے کہا کہ 2018 میں پی ٹی آئی نے کراچی سے 14 نشستیں جیتی تھیں، آج تحریک انصاف سے کراچی کی تمام سیٹیں چھین لی گئی ہیں، سندھ میں ایم کیو ایم اور پیپلزپارٹی کو نشستیں تحفے میں دی گئی ہیں۔
